Na Saleh Ally
BENCHI la ufundi la Simba limeanza kazi, kwa maana ya
muonekano kila mmoja ameona kwamba ni makocha waliopania kuleta mabadiliko
katika kikosi hicho.
Uongozi wa Simba, nao unaonekana umepania kuleta mabadiliko
ili kukabiliana na ushindani mkubwa wa msimu ujao ambao unaonekana wala
hauhitaji kumulikwa maana kila timu inajiandaa vilivyo kuanzia kwenye usajili.
Wakati hayo yanaendelea, Kocha Mkuu wa Simba, Dylan Kerr
raia wa Uingereza, amependekeza kusajiliwa kwa kipa mwingine mkongwe katika
kikosi hicho.
Inawezekana hilo ni wazo la Kerr, lakini inawezekana ni wazo
kutoka kwa mtaalam wa makipa ambaye ni kocha mpya wa Simba. Huyu ni Iddi Salim
ambaye amejiunga na Simba akitokea AFC Leopards ya Kenya. Pia amewahi kuwa
Kocha wa Makipa wa Gor Mahia na Harambee Stars.
Kerr na Iddi, wote wawili ni makocha au wataalam wa kazi
yao. Ndiyo maana wamependekeza kusajili kwa kipa mwingine licha ya Simba kuwa
na makipa watatu wenye uwezo wa kudaka katika michuano migumu kama ya Ligi Kuu
Bara.
Achana na makinda wawili ambao mara nyingi wamekuwa katika
mazoezi ya kikosi cha kwanza cha Simba, yaani David Kisu na Dennis Richard,
Simba ina makipa wengine watatu.
Kwanza ni mkongwe Ivo Mapunda, kinda ambaye ameshaonyesha
uwezo wake, Peter Manyika pia ilisajili kipa mpya Mohammed Abrahman Mohammed
ambaye anatokea JKU ya Zanzibar akaonekana kwenye vyombo vya habari akisaini
mbele ya Mwenyekiti wa Kamati ya Usajili ya Simba, Zacharia Hans Poppe,
nafikiri unakumbuka.
Simba tayari imekubaliana na wazo la Kerr na benchi lake la
ufundi, imeingia katika mazungumzo na kipa Boniface Oluoch kutoka Gor Mahia.
Hakika kipa huyo ni kati ya makipa bomba kabisa.
Pamoja na uzuri wa Oluoch, najaribu kujiuliza mustakabali wa
kipa Manyika ambaye msimu uliopita, Simba ilimpa nafasi ya mechi zaidi ya sita
na akaonyesha kwamba ni mmoja wa makipa bora wa baadaye.
Takribani mechi tatu zikiwemo zile za Mtibwa Sugar na
Prisons, Manyika alifanya makosa yaliyoiponza Simba kupoteza pointi mbili
kutokana na kulazimishwa sare.
Huenda msimu huu, Manyika angekuwa anatakiwa kuilipa Simba
kutokana na makosa yake yale ya kitoto aliyoyafanya. Hakuna ubishi, ilikuwa ni
lazima afanye vile ili aweze kukua!
Sasa Simba ina makovu ya makosa yake, lakini ajabu inakuwa
na makipa wawili wakongwe juu yake, kama kweli itamsajili Oluoch. Maana yake,
Manyika anashuka kutoka kipa wa pili hadi wa tatu. Nafasi yake ya kucheza
katika mechi za Ligi Kuu Bara itateremka kwa asilimia 80, jambo ambalo halina
ubishi litamrudisha nyuma kwa mara nyingine.
Kwa kukosa nafasi ya kucheza kwa asilimia 80, Simba
isimtegemee Manyika kukua kwa kasi kama ambavyo alifanya msimu uliopita. Miaka
mingine miwili ijayo, huenda Manyika akaendelea kubaki yuleyule wa siku zote.
Niliona isingekuwa sahihi Simba kukimbilia kusajili kipa
mpya kwa kuwa kocha tu amesema. Kweli ni mtaalamu, lakini anaweza kushauriwa.
Mambo mawili yangefanyika awali, moja ni kumueleza kocha
huyo mpya Simba ilikopita na Manyika na safari yake ilivyokuwa, pia malengo yao
kwa kijana huyo. Pia ikarudi kwa Manyika na kumueleza kilichotokea, hivyo
apambane asiwaangushe viongozi, asiwaangushe mashabiki na wanachama wa Simba,
pia asijimalize kama atashindwa kuitumia nafasi hiyo.
Halafu jambo la mwisho, Kerr tena akimtumia mtaalamu wa
makipa kama Iddi Pazi wakafanya kazi ya kuboresha zaidi kiwango cha Manyika kwa
kuwa kipaji cha soka katika nafasi hiyo, kimo ndani ya damu yake.
Sasa anachohitaji ni mafunzo bora ya ukipa. Lazima tukubali,
makipa wa Tanzania wanaweza kubaki na viwango vilevile kwa kuwa hawana walimu
wenye elimu ya juu na ya kisasa kwa upande wa makipa.
Kerr anaweza kuhitaji kipa sasa, kwa kuwa anaangalia
mafanikio yake ya haraka ndiyo maana anasisitiza ‘readymade’, lakini bado
Manyika anaweza kumsaidia yeye na akiondoka, atabaki kuendelea kuisaidia Simba.
0 COMMENTS:
Post a Comment