HAYA 'MADUDU' YANAYOFANYWA KWENYE LIGI YA BONGO LAZIMA UWE NA 'PANADO' PEMBENI

NAPATA kizunguzungu kufikiria namna mwenendo wa ligi yetu ya Tanzania inavyokwenda kutokana na mfumo uliopo na maendeleo yake yanavyokwenda kwa kusuasua hali ambayo inanifanya nitulie kidogo.

Nimekuwa na kawaida moja kila siku asubuhi kutazama namna ligi ya wenzetu kule ambako mpira wetu tunataka kuupeleka na hapa tulipo huwa najiuliza tunakwama wapi.

Kinachonifanya nishindwe kuelewa vizuri ni namna mashindano yao kwa wenzetu yalivyo mengi lakini bado wanauwiano sawa wa mechi za kucheza na kama ni kutofautiana hapo utakuta ni mechi mbili ama tatu tena za lazima.

Sasa kwenye ligi yetu sasa ni lazima niwe na panaldo pembeni ili nikimaliza kupitia nitulie kidogo kwani mambo kwetu ni mengi na muda wenyewe si rafiki.

Mpaka sasa kuna timu zina viporo mpaka tisa nyingine tatu swali kubwa la msingi mipango ya ligi yetu inakwama wapi na sio tatizo la siku moja bali ni miaka nenda rudi hapa pana tatizo bodi ya ligi inabidi ishtuke.

Kwa mazingira haya ushindani unazidi kuwa mdogo tena ni kwa baadhi ya timu jambo ambalo linaua ushindani wa ligi na kufanya ligi iwe na matabaka.

Hebu fikiria kwa yule ambaye amecheza michezo 32 akikutana na yule mwenye michezo michache unadhani nini kitatokea kama sio kupasua tu kichwa hapo msomaji.

Inakuwa ngumu kuleta ushindani hasa baada ya timu kugundua kwamba hazina cha kupoteza endapo zitashinda ama zitapoteza maana tayari inaingia uwanjani akili ya ushindani ikiwa imepotea.

Labda kidogo kwa yule ambaye anatafuta nafasi ya kubaki ligi kuu anaweza kuonyesha ushindani ili atetee nafasi yake kubaki ndani ya ligi je kwa yule ambaye hana nafasi ya kubaki ligi atashindania nini?

Je yule ambaye anajua hata ashinde ama asishinde atabaki kwenye ligi na msimu ujao ataendelea kupambana, atafanya nini kucheza na timu ambayo ina nguvu na viporo vya kutosha, lazima ushindani utakufa taratibu.

Ili ligi inoge na ilete ladha yenyewe ni lazima timu zishindanie nafasi ya kwanza asiwepo mwenye kuimiliki kwa namna anavyotaka hii inaua ushindani hata kwa yule anayeongoza.

Kinara anajua kwamba hata kama ikitokea anashindwa kupata matokeo bado ataongoza ligi hivyo atacheza namna anavyojiskia naye pia hana cha kupoteza.

Ifike wakati Bodi ya Ligi kwa kushirikiana na viongozi wa Shirikisho la Soka Tanzania watazame namna bora itakayotuondolea haya yote ambayo naona ni madudu na yanatibua ligi yetu.

Mchezo mbaya na unaomaliza wachezaji wetu ni upangaji wa matokeo hasa kwa nyakati hizi za mwisho na lala salama kila mmoja anatafuta mbinu itakayomfanya apate kile anachokitaka hii si sawa ni lazima ifanyiwe kazi.

Kama tatizo ni mashindano ya kimataifa basi ratiba iwe rafiki na mpangilio mzima ufuatwe kama ambavyo inapangiliwa na kukubaliwa.

Ule mtindo wa kuua mechi kisa maandalizi ya timu fulani naona usipewe nafasi kwani unafanya kuwe na matabaka ya timu zinazopewa kipaumbele nyingine zinaonekana zinasindikiza tu.

Misimu huu ambao unakwenda lala salama tumeshuhudia ushindani mkubwa licha ya kutokuwa na wadhamini hili liwe somo kujipanga vema msimu ujao kuona tunavunja yale ambayo tumeshindwa kuyafanya msimu huu.

Rai yangu ni kwamba mipango makini na ratiba bora itaikuza ligi yetu na kufanya ushindani kuwa mkubwa kila siku tofauti na ilivyo kwa sasa ambapo kila timu inafanya vile ambavyo inajiskia kubadili ratiba.

Kila kitu kinawezekana endapo mipango itaanza mapema hasa kwa sasa masuala ya wadhamini yalipaswa yawe yamewekwa wazi na timu ziambiwe mapema kama kinaeleweka ama mambo bado.

Yasije kutokea kama msimu huu timu zinategemea kupata sapoti kutoka kwa mdhamini ghafla zinapewa taarifa hakuna mdhamini hii haitakuwa sawa.

Kutoka Championi