MHOLANZI AKUBALI KUIFUNDISHA YANGA, KABLA YA UTURUKI ATAKA KUMUONA LOGARUSIC ZENJI KESHO

Kocha Franciscus ‘Hans’ van der Pluijm ametua jijini Dar es Salaam na kukubaliana na Yanga kuingia mkataba wa miaka miwili.

Mkataba huo utasainiwa kesho asubuhi na baada ya hapo, Mholanzi huyo anatarajia kufunga safari kwenda Zanzibar kuiangalia Simba ya Zdravko Logarusic ikicheza fainali ya Kombe la Mapinduzi.

Halafu Jumanne, ataingia kwenye pipa kwenda Uturuki kuungana na kikosi cha Yanga kilicho kambini mjini Antalya.

Kocha huyo alitua nchini leo saa tatu asubuhi na moja kwa moja akapelekwa hotelini.

Baada ya hapo, mazungumzo yalifanyika katika hoteli moja saa 5 asubuhi akiwa na watu wa kamati inayohusiana na masuala ya usajili.

Mazungumzo kati ya van der Pluijm na viongozi hao wa Yanga yalikatishwa ili kumpa nafasi ya kupumzika na baadaye saa 10 jioni wakakutana tena.

Ijumaa iliyopita, Championi kilikuwa chombo cha habari cha kwanza kuandika kuhusu kocha huyo aliyetengeneza jina nchini Ghana kuanza mazungumzo na Yanga.

Kama  Yanga isingemsajili, chaguo la pili alikuwa ni Lars Olof Mattsson, raia wa Sweden.

Van der Pluijm alipata mafanikio makubwa akiwa na Berekum Chelsea ya Ghana katika msimu wa 2012-13 katika Ligi ya Mabingwa Afrika.

Kocha huyo Mholanzi amewahi kuvaana na kikosi cha Logarusic wakati wote wakiwa nchini Ghana wakipiga kazi.