NURDIN BAKARI AKATWA MSHAHARA TABORA

Kiungo wa Rhino Rangers ya Tabora, Nurdin Bakari, amerejea katika kikosi hicho na kukatwa mshahara baada ya kushindwa kuripoti kambini Tabora kwa wakati.

Kiungo huyo ambaye aliwahi kuichezea Yanga  kabla ya msimu huu kutua katika kikosi hicho cha jeshi, alichelewa kuripoti kambini bila kueleza sababu za msingi, hali iliyosababisha uongozi umjadili.

Katibu wa timu hiyo, Paul Maganga, alisema kiungo huyo amerejea na kuchukuliwa hatua za kinidhamu ili asiweze kurudia tena.

“Uongozi umempatia barua ya kumuonya na kumkata mshahara kwa siku ambazo  amechelewa kufika kambini na kuungana na wenzake. Kwa sasa tayari amesharejea.

“Lakini baada ya kumpatia barua, tunashukuru naye aliweza kuandika barua kwetu kwa ajili ya kuomba msamaha na kueleza yale ambayo yalimkwamisha kufika kwa wakati,” alisema Paul.