LIPULI YASITISHA MIPANGO YA KUMFUNGULIA NSAJIGWA MASHTAKA

Klabu ya Lipuli ya Iringa, imesema imefuta mpango wa kumfungulia mashtaka aliyekuwa kocha wao Shadrack Nsajigwa, baada ya kocha huyo kutimkia Nepal.

Nsajigwa anatuhumiwa kukimbia klabu hiyo, akiwa amekaa klabuni hapo kwa miezi miwili wakati akiwa na mkataba wa mwaka mmoja, hivyo Lipuli walitaka walipwe fidia.

Katibu wa Lipuli, Willy Chikweo, alisema mpango wa kumuweka ndani beki huyo wa zamani wa Yanga, wameachana nao kwa kuwa amekimbilia nje ya nchi.

“Tumekubaliana kumsamehe, maana kwanza tunasikia alikimbilia Nepal. Pili, familia yake inaishi kwa kutegemea ajira hii ya soka, hivyo tuliona tukimshtaki tutakuwa tunahatarisha maisha ya familia yake, kwa sababu alitakiwa atulipe sisi miezi iliyobaki na tunajua hana hiyo hela,” alisema Chikweo na kuongeza kuwa, msamaha huo pia unamhusu kiungo Godfrey Bonny aliyetoweka klabuni.