REKODI MPYA YA SSERUNKUMA AKIWA NA SIMBA, HII HAPA

Baada ya kufanikiwa kuipa ushindi wa mabao 2-1 klabu yake ya Simba mbele ya JKT Ruvu Jumamosi iliyopita, mshambuliaji wa klabu hiyo, Mganda, Danny Sserunkuma, ameweka rekodi ndani ya klabu hiyo ya kuwa mchezaji pekee aliyepachika bao la mapema zaidi katika mechi za ligi kuu msimu huu.

Sserunkuma ambaye alisajiliwa na Simba katika usajili wa dirisha dogo msimu huu, ameshaichezea klabu hiyo mechi nne na kufanikiwa kupachika mabao matatu, alifunga moja dhidi ya Ndanda na mawili Jumamosi iliyopita kwenye mchezo dhidi ya JKT Ruvu.

Katika mchezo huo uliopigwa kwenye Uwanja wa Taifa, Dar, Simba walionekana wazi kuupania ili kuibuka na ushindi, kwani walianza kuwashambulia wapinzani wao kwa kasi na kufanikiwa kupata bao la kwanza katika dakika ya pili kupitia kwa mshambuliaji huyo Mganda.

Licha ya kupachika bao hilo Sserunkuma akafunga bao lingine katika dakika ya 49 ikiwa pia ni bao la mapema kufungwa katika kipindi cha pili kwa timu yao.