KOPUNOVIC, MATOLA WATANGULIA KUIFUATA YANGA

Yanga inatarajiwa kushuka uwanjani leo pale Mkwakwani mkoani Tanga, kukipiga dhidi ya Coastal Union, lakini upande wa pili ni kuwa makocha wa Simba, Goran Kopunovic na msaidizi wake, Selamani Matola wanatarajiwa kuwa uwanjani hapo kuishuhudia mechi hiyo.

Yanga itakuwa mgeni wa Coastal, katika mechi hiyo ya Ligi Kuu Bara ikiwa inajiandaa kukipiga dhidi ya BDF ya Botswana, katika Kombe la Shirikisho, lakini Kopunovic atakuwa uwanjani hapo akishuhudia mechi hiyo na kuchukua mambo fulani kuhusu mpinzani wake Hans van Der Pluijm, ambaye ni kocha wa Yanga.

Imefahamika kuwa Kopunovic na Matola wanatarajiwa kuondoka mapema leo jijini Dar, ili kuiwahi mechi hiyo wakati timu yao ikitarajiwa kuondoka baadaye mchana kwenda Tanga ambapo pia itakuwa na mechi Jumamosi ijayo dhidi ya Coastal kwenye uwanja huohuo wa Mkwakwani.

Mtoa taarifa kutoka Simba ameliambia gazeti hili kuwa, makocha wao wanaenda kuzisoma timu zote mbili, Yanga ambao tayari wapo Tanga na Coastal kwa kuwa wanajua wote ni wapinzani wao kwenye ligi.

“Makocha wataondoka mapema kesho (leo) nia ni kuiwahi hiyo mechi, unajua Kopunovic bado ni mgeni wa ligi ya Bongo, ndiyo maana anahitaji kuzijua timu zote kwa ukaribu,” alisema mtoa taarifa.

Kuhusiana na safari hiyo, Matola alisema kwa ufupi: “Kweli tutaenda Tanga, ila tuwasiliane baadaye nipo kwenye kikao.”