ALIYEMKABA TAMBWE, ATUHIMIWA KUMGONGA STRAIKA STENDI HADI KUZIMIA

Yule beki aliyemkaba koo mshambuliaji wa Yanga, Amissi Tambwe hivi karibuni, George Ossei Michael, ameibuka tena na kuzua gumzo baada ya kumgonga mshambuliaji wa Stand United, Pastori Anathans na kumfanya apoteze fahamu.

Tukio hilo lilitokea katika mchezo wa Ruvu dhidi ya Stand United kwenye Uwanja wa Mabatini, Pwani Jumapili iliyopita na kuchezeshwa na mwamuzi Kennedy Mapunda.

Katika mchezo huo, Ruvu iliibuka na ushindi wa mabao 2-1.

Mkurugenzi wa Ufundi wa Stand, Muhibu Kanu, amesema kuwa wamesikitishwa na kitendo cha mchezaji wao kujeruhiwa na refa kutochukua uamuzi wowote.

 “Sipendi kuongelea waamuzi, lakini yule wa juzi alinishangaza kidogo, mchezaji anagongwa mpaka kupoteza fahamu yeye hachukui hatua yoyote, wengi wamezabwa vibao hakuchukua hatua yoyote.

“Beki wao yule George alikuwa anacheza rafu sana na ndiye aliyesababisha Pastori apoteze fahamu, mambo mengi yalitokea katika mchezo ule, lakini yalifumbiwa macho, TFF wanatakiwa kuwa makini kuhakikisha mambo yanakwenda sawa, wasitumie ripoti pekee, watumie hata video,” alisema Kanu.

Kwa upande wa Msemaji wa Ruvu Shooting, Masau Bwire, alipoulizwa kuhusiana na suala hilo, alifunguka kuwa yeye hakuliona.