BAADA YA AME ALI, SASA WABONGO BASI AZAM FC

AME ALI.

Kama bado kuna mchezaji raia wa Tanzania anawaza kuichezea Azam FC kwa msimu ujao aandike imekula kwake kwani timu hiyo imefunga usajili kwa wachezaji wa ndani pindi tu ilipomnasa Ame Ally kutoka Mtibwa Sugar.

Kwa sasa Azam ina majina ya nyota kadhaa wa kigeni inayotaka kuwasajili lakini wanasubiri tu kauli ya Shirikisho la Soka Tanzania (TFF) juu ya idadi ya nyota wa kigeni kikosini.

Mkurugenzi Mtendaji wa Azam, Saad Kawemba amesema Zungu ndiye mchezaji wa mwisho kujiunga nao na walimhitaji kwa muda mrefu.

“Labda litokee tatizo tu lakini tumeshafunga usajili kwa wachezaji a ndani na sasa tunasubiri kauli ya TFF kama itaongeza idadi ya wachezaji wa kigeni tuwasajili tulionao,” alisema Kawemba.

Alisema katika orodha yao kuna wachezaji kutoka Afrika Magharibi na Kusini ambao watasajiliwa pindi ruksa itakapotoka ya kusajili wachezaji kumi wa kigeni.

Wakati huohuo, wachezaji wawili kiungo Bamidele-tope Julius kutoka Nigeria na Laurent Raphael kutoka Kayanga FC ya Kagera wanafanya majaribio katika kikosi hicho.