MAKALA: VIJANA WA KITANZANIA WAMEONYESHA UJERUMANI KUWA KILA KITU KINAWEZEKANA, LAKINI...

VIJANA WA KITANZANIA WAKIFURAHIA KOMBE NA MEDALI WALIZOSHINDA KATIKA MICHUANO ILIYOMALIZIKA PUNDE KATIKA MJI WA FREIBURG NCHINI UJERUMANI..

*Lakini wamewaonyesha kuna matatizo pia ya kuyafanyia kazi

Na Saleh Ally, Freiburg

Vijana wa Kitanzania wamehitimu mafunzo yao ya miezi mitatu katika mji wa Freiburg hapa Ujerumani na kuweka wazi mambo mengi sana ambayo yanaweza kutoa msaada katika maendeleo ya soka nchini Tanzania.

Freiburg ni mji ulio Kusini mwa Ujerumani ukiwa unapakana na nchi za Uswiss na Ufaransa, karibu kabisa na mji wa Strasbourg aliozaliwa Kocha Mkuu wa Arsenal, Arsene Wenger.

JAPHETERRY MAKARANGA AKIMTHIBITI KIUNGO WA FLUMINENSE YA BRAZIL

Vijana hawa walikuwa wameweka kambi yao nje kidogo ya Freiburg katika mji wa Hausen ambao ni sawa na kijijini lakini maendeleo yake kwa nyumbani Tanzania, yako juu sana. Walikuwa wakisoma pamoja na kufanya mafunzo mbalimbali ya mchezo wa soka.

Vijana hao walikuwa 11, lakini hadi mwisho wanamaliza walikuwa wamebaki watano baada ya Emily Mugeta kurejea Tanzania, mwezi mmoja kabla ya kwisha kwa mafunzo na kujiunga na Simba ambayo alikuwa akiichezea.

FRANK SEKULE AKIAMBAA NA GOZI KATIKA MECHI DHIDI YA FLUMINENSE YA BRAZIL

Wengine waliomaliza mafunzo hayo walikuwa ni Frank Sekule, Japhet Vedastus, Miraji Madenge, Kalos Kirenge na Rajabu Rashid.

Walikuwa wakifanya mafunzo chini ya Fels Project ambayo ilikuwa inahusisha masuala ya elimu ya maisha pamoja na soka. Lakini walikuwa wakifundishwa mambo lugha ya Kingereza kwa ajili ya kuwasaidia katika mawasiliano.

WAKIWA NA FURAHA BAADA YA KWISHA KWA MASHINDANO

Championi liliripoti wakati wakiendelea na kozi kuanzia mwanzo na mafunzo hayo ya vijana yanaonyesha kuna mambo mengi yanawezekana Tanzania, lakini mkazo na umakini huenda umekuwa tatizo kubwa.

Mazingira:

Imeonyesha wazi mazingira waliyokulia vijana hao, wengi wakiwa wanatokea katika kituo cha TSC cha Mwanza ni magumu. Hivyo kunakuwa kuna ugumu wa juu katika masuala ya elimu na uelewa katika maisha hasa katika dunia ya sasa.

Lakini hakuna msaada wa kutosha, inawezekana kutoka kwa wazazi au jamii inayowazunguka ambayo inataka iendeshe mambo kibabe na zaidi kuangalia ukubwa kwa kigezo cha heshima.

Kwamba malezi ya watoto wengi wa Kitanzania, hayatoi nafasi kwa watoto kujieleza au kuchagua wanataka nini na badala yake ni uamuzi wa wazazi pekee na mtoto anachotakiwa ni kutekeleza, hiyo inaitwa ni heshima lakini katika hali halisi ni amri tu bila kuhoji.

Mafunzo:

Vijana wengi wa KItanznaia bila ya kujali wanafikia wapi kisoka, wamekuwa wakijiinua wenyewe kwa kiasi kikubwa bila ya msaada wa mafunzo.

Maana yake, timu mwisho zimekuwa zikiangalia vijana wenye vipaji lakini bila ya kujali kwamba wanastahili mafunzo na kuwafundisha mfano kuwa na shule bora za soka.

Badala yake, wao wenyewe wanajitegemea na mwisho wanapata timu bila ya mafunzo na hali hiyo imekuwa ikisababisha ugumu sana hasa kwa makocha wageni wanaotokea barani Ulaya ambao hujaribu kufundisha kwa kufuata mfumo wa kisasa na kunakuwa na ugumu.

Kwani mafunzo anayoyapata mchezaji akiwa Yanga, Simba au Azam FC yanakuwa magumu kwa kuwa anaanza mafunzo ya chuo kikuu bila ya kupitia yale ya shule ya msingi wala sekondari.

Kujituma:

Bado inaonekana kuna tatizo la kujituma kwa wachezaji wengi wa Kitanzania, huenda pia wangejifunza hayo wakiwa katika shule za awali za soka ambazo wengi hawapati nafasi ya kupitia huko.

Hivyo inafanya vijana wengi wakwame katikati na wakati mwingine inakuwa ni lahisi kuridhika na walichonacho au wanachokipata katika wakati husika.

Inaonekana somo la kwamba maisha au kutimiza ndoto ya unachokitaka lazima ujitume halijawaingia vizuri. Wangeweza kulipata tokea wakiwa makinda kwa kukumbushwa kila mara kwa msisitizo, basi isingekuwa shida kwao ukubwani.

Hata hivyo vijana hao waliokuwa hapa wameonyesha uwezo mkubwa kisoka, walikuwa wakijituma na wahusika wa Fels Project wanaamini kutokana na mazingira waliyopitia basi wamejitajhidi sana kwa kiasi sana.

Pamoja na mambo mengine, lakini walifanikiwa kupata vikombe na medali na zaidi vilihusiana na suala la Fairplay, kitu ambacho ni bora pia kwa maana ya kutambua mchezo wa soka unataka nini.

Kutokana na mazingira waliyokulia hadi kufikisha kuanzia miaka 18, vijana hao wameweza kuishi katika mazingira ya Ujerumani na kufanya vizuri kabisa.

Hii ni dalili kwamba kila jambo linawezekana lakini msingi mzuri ndiyo uti wa mgongo, pia ni vema kukawa na hali ya kuonyesha kweli vijana wanapaswa kuandaliwa tokea wakiwa wadogo.