MAKALA: HILI SUALA LA MANJI, YANGA MTANATAKA KUJIVURUGA WENYEWE TU

UKIANGALIA mambo yanavyokwenda katika klabu ya Simba katika kipindi hiki, hayaridhishi, si ya kiuanamichezo na inaonekana wazi kuwa kuna makundi na sasa hakuna anayewaza maendeleo ya klabu au kikosi cha Simba.

Hakuna anayeweza kukataa kuwa Simba wanavurugana katika kipindi hiki na tafrani zote zinatokana na makundi yanayotokana na uchaguzi, wengine wanamtaka huyu, wengine yule.

Kama kuna mtu atakuwa anafurahia kinachotokea Simba kwa watu kugombea fito, atakuwa ni wa ajabu sana. Angalia maneno ya kashfa, kudhalilishana hadharani na wengi wakionekana kutojali lolote, si sahihi!

Sasa ajabu, inaonekana hata baadhi ya wanachama wa Yanga wanaonekana kuvutiwa na hilo, huenda wanatamani kinachotokea Simba basi kianze Jangwani. Wanasema wanapinga uamuzi wa wanachama wenzao zaidi ya 4,000 kumuongezea mwaka mmoja madarakani Mwenyekiti wao na uongozi wake.

Yusuf Manji aliongezewa mwaka mmoja na wanachama hao kwenye mkutano uliofanyika wiki iliyopita jijini Dar es Salaam. Kweli, ajenda haikuwa hiyo, badala yake ni kupitia marekebisho ya katiba kutokana na maagizo ya Shirikisho la Soka Tanzania (TFF).

Manji hakuanzisha ajenda hiyo, badala yake wanachama pamoja na wajumbe wa baraza la wadhamini ambalo Mwenyekiti wake ni Mama Fatma Karume ambaye hauwezi ukasingizia eti ana njaa ndiyo maana alifanya vile kwa kuwa amehongwa au kupata mlungura.

Kumbuka Mama Karume ni Mama wa Taifa, marehemu mumewe, Abeid Aman Karume ni kati ya waliopigania maendeleo ya Yanga kwa kiasi kikubwa wakati wa uhai wake. Ulizia ndiye chanzo cha jengo la makao makuu ya klabu hiyo. Sasa vipi mkewe afanye kitu ambacho si sahihi na kitaiangamiza klabu hiyo.

Manji alipewa miaka nane na wanachama hao, lakini yeye akaona sahihi au angalau mmoja, sasa vipi anapaswa kupopolewa. Vipi anayekataa alishindwa kwenda kwenye mkutano.

Hakuwepo, anaweza kupinga kilichoamuliwa na wanachama karibu wote hai wa Yanga? Kama kweli ni demokrasia, vipi wanaopinga wasifuate utaratibu badala ya kuzungumza maneno mengi ya kashfa kuhusu Manji?

Inawezekana kabisa kuna makosa kafanya, lakini mangapi na pia wasisahau ni mazuri mangapi kafanya kwa ajili ya Yanga. Pia kuna sababu ya kukumbuka, kwa wanaomlaumu Manji wameifanyia nini Yanga au ndiyo kupiga mdomo tu!

Kingine kizuri kinachotakiwa ni wanaochambua hoja ya Manji na uongozi wake kuongezwa mwaka mmoja iwe hivi, wapitie vipengele vya katiba na kueleza kwamba wamekiuka katiba au ni sahihi. Si sahihi kulalama tu kama hewa!

Yanga wanapaswa kuepuka vitu ambavyo vinaweza kusababisha wao kuingia kwenye malumbano, chuki kama ambavyo hali imefikia sasa Simba. Watu wanaishi kwa kuwindana, kila mmoja anaangalia wapi pa kumtukana au kumdhalilisha mwenzake.

Waliompinga Manji, mwanzo kabisa wameanza na maneno ya kashfa ambayo mwenyekiti huyo hastahili. Lakini kama wanataka kumkosoa, ziko njia sahihi na vema watumie hoja za msingi.

Soka ni fedha, soka linahitaji wapanga mipango na wanaotaka kuutumikia mchezo huo kwa dhati. Hakuna haja ya kuona haya, Yanga na mchezo wa soka nchini unahitaji watu kama Manji, wenye nguvu kifedha, uwezo wa kupanga na kutekeleza na si wale wanaotaka kuingia madarakani ili wafaidike.

Sasa vipi kila mwenye uwezo analazimishwa kuwa adui, kwa kuwa tu kuna watu hawamkubali kwa kuwa alikataa kuwasaidia kwenye kampeni zao za kisiasa au mambo yao ya kimaisha. Sasa hayo ndiyo maslahi ya Yanga au soka ya Tanzania.

Vizuri Wanayanga wajiulize mara nyingi, huu si muda wa kuzozana na wapenda soka wasingependa malumbano kama yale ya Simba. Watu wanahitaji mipango na soka la uwanjani, si maneno  mengi na blahbla tu!