TOBHIAS KIFARU AELEZA MAULID KITENGE ALIVYOMPA USEMAJI MTIBWA SUGAR

KIFARU.

JINA la Thobias Kifaru siyo geni katika soka la Tanzania, huyu ni Ofisa Habari wa Mtibwa Sugar akidai kuwa amedumu katika cheo hicho kwa miaka 25 klabuni hapo.

Kifaru ambaye aliwahi anasema aliwahi kuichezea timu hiyo mwaka 1983 akiwa kipa ambapo kipindi hicho ilikuwa timu ya kujifurahisha kutoka Kiwanda cha Mtibwa Sugar, ni mmoja ya waanzilishi wa timu hiyo ambayo ilianza rasmi yapata mwaka 1983 ikiwa chini ya kaka yake aliyefahamika kwa jina la John Kifaru.

“Mwanzoni tulikuwa tunacheza kujifurahisha, baadaye tukaingia katika ushindani mwaka 1984 kwa kuanzia Ligi Daraja la Nne ambapo mimi nilikuwa kipa lakini tulipofika la tatu sikuendelea kucheza, iliendelea hivyo mpaka mwaka 1996 ilipofika Ligi Kuu Bara enzi hizo ikitambulika kuwa Ligi Daraja la Kwanza.

“Niliacha kucheza nikaendelea na majukumu yangu ya kuajiriwa pale kiwandani kwa sababu mimi ni mtu IT (Information Technology) lakini huku naendelea kusimamia timu hapo mwanzilishi wa timu kaka yangu alikuwa amefariki mwaka 1993 na mlezi wa timu alikuwa ni Sosteness Magese baba mzazi wa Happiness Magesse huku nikiendelea na kazi hiyo pamoja na uandishi wa habari wa kujitegemea.

Ilikuwaje ukawa msemaji?

Mwaka 1996 kama sijakosea nikiwa nafanya kazi ya uandishi pale katika Gazeti la Nipashe na vyombo vingine vya habari, Maulid Kitenge akiwa anasoma ndiyo alianza kuniita msemaji, tangu hapo mpaka leo nikawa msemaji wa Mtibwa Sugar.

Timu yako ikifungwa hali inakuaje?

Naumia lakini siyo kuwa nashindwa kuzungumza, mimi kabla na baada ya mechi naongea bila kujali aina ya matokeo.

Kipi hutasahau katika kazi yako?

Miaka mitano iliyopita niliacha kufanya kazi kwa takribani mwaka baada ya kuhusishwa kuwa nilichukua rushwa kwa Azam FC baada ya kutufunga mabao 3-0.

Kilichonifanya nihusishwe ni kitendo cha kuwakaribisha kule Manungu na kuwaonyesha hoteli ya kufikia na njia za kupita. Mwenyekiti kipindi hicho alikuwa Ali Mhina alinituhumu kuchukua rushwa, niliumia sana.

Baada ya kuona klabu inapotea ilibidi mkurugenzi wetu, Jamary Bayser awatumie viongozi kama wakina Bernard Kihaule na Salum Kijazi kuniomba msamaha baada ya kugundua zilikuwa ni chuki binafsi, nilikubali nikarudi kuendelea na kazi.

Kuhusu tambo kabla ya mechi

Nina uzoefu sana na klabu za Tanzania, nipo karibuni miaka 25 kila timu naijua ndiyo maana huwa nazichambua vizuri na siyo kwamba nakurupuka tu.

Siri ya Mtibwa kufanikiwa ni nini?

Tulijipanga mapema na kwa kuwa timu yetu inaongozwa kikampuni ndiyo maana inakuwa rahisi kwa sababu kila kitu kinachohitajika kwa wachezaji na viongozi wa benchi la ufundi kinapatikana.

Kitu gani hupendi?

Sipendi kufananishwa na wasemaji wa klabu nyingine ambao wamekuwa hawazitendei haki klabu zao kwa kutotoa ushirikiano mzuri kwa vyombo vya habari.

Unapokea simu ngapi za ‘media’?

Siku za mechi ndiyo huwa napata shida sana lakini sina jinsi ndiyo majukumu yangu, huwa naongea na simu zaidi ya 50 kutoka kwa wanahabari.

Naweza kutumia saa tatu kujifungia ofisini, sirudi nyumbani mpaka nitakapomaliza kazi yangu hiyo.

Hapo TFF ndiyo wanatakiwa kutufikiria kutupa fedha kwa sababu wasemaji ndiyo tunaojaza watu uwanjani kwa mbwembwe zetu.

Simba, Yanga zimewahi kukufuata?

Ndiyo, Simba walimuagiza kiongozi wao wa hapa Morogoro kuwa wananihitaji lakini sikuwa tayari kwa sababu naipenda klabu yangu.