ZAIDI YA WATU MILIONI MBILI, HAKUNA ALIYEJUA OKWI ATAFANYA NINI

Na Saleh Ally

NAANZA kwa kukumbushia ule msemo wa ‘kisela’ kuwa hakuna mtu mwenye uwezo wa kuipiga chenga njaa.

Wapenda michezo wameuongezea utamu msemo huo kwa kusema hivi; “Hata uwe mshambuliaji mkali vipi, hauwezi kuipuga chenga njaa.”

Lakini bado kila mmoja mwenye kupenda mchezo wa soka, halafu akaweka kando ushabiki atakuwa na nafasi ya kumpongeza mshambuliaji wa Simba, Emmanuel Okwi ambaye alifunga bao la aina yake wakati timu yake ikiishinda Yanga kwa bao 1-0 katika mechi ya mzunguko wa pili wa Ligi Kuu Bara.

Mashabiki 49,758 waliolipa viingilio kushuhudia mechi ya watani wa jadi Simba na Yanga kwenye Uwanja wa Taifa, Jumapili, hakuna hata mmoja ambaye alijua alikuwa akifikiria kwamba Mganda huyo angeweza kuupiga mpira huo na kumpita kipa Ally Mustapha ‘Barthez’ na kutinga wavuni.

Kweli Barthez alifanya kosa, lakini huenda ukubwa wa kosa lake unaboreshwa na akili nyingi alizozitumia Okwi katika kuupiga mpira huo akiwa katika kasi.

Takribani mita 35 tokea alipopiga na kufunga, kwa kipa yoyote si lahisi kutegemea mshambuliaji anaweza kufanya hivyo tena akiwa karibu na beki.

Unakumbuka mabao ya David Beckham au lile la Wayne Rooney, ni sehemu ya mabao ya aina hiyo kufungwa uwanjani pia ni nadra kutokea.

Si vibaya kusema tokea Uwanja wa Taifa uanze kutumika, lango ambalo amefunga Okwi, halijawahi kufungwa kwa bao la aina ile. Angalau lango la Kaskazini, yaani upande wa Simba, litakuwa na kumbukumbu ya bao safi la Jaja aliyekuwa akikipiga Yanga wakati ikiadhibu Azam FC kwa mabao 2-0 katika mechi Kombe la Jamii.

Sasa kwa bao kama lile la Okwi, utaona mechi inayofuatia Barthez anakaa nje, utaona mashabiki wa Yanga wanalalamika, utaona taarifa zinasema kwa kuwa ametokea Simba!

Barthez amedaka zaidi ya mechi saba kwa ufasaha mkubwa na hata siku hiyo amefungwa bao moja, bao bora na si zaidi! Bao ambalo kila aliyekuwa akiangalia mpira uwanjani au mamilioni ya mashabiki waliokuwa wakishuhudia kupitia runinga, hakuna hata mmoja alijua Okwi angefanya alichotekeleza.

Nilizungumza na makocha wawili, Goran Kopunovic wa Simba na Hans van der Pluijm wa Simba, kila mmoja alisema hakutegemea itakuwa vile.

Pluijm alisema umakini wa mabeki kuhakikisha Okwi hafanyi uamuzi ulichangia yeye kupiga, lakini akakiri kihesabu Barthez alikuwa amepotea.

Kocha wa Simba, yeye alisisitiza mfumo wa kushambulia kwa haraka waliojifunza ulisaidia. Lakini akaongeza kuwa Okwi anapaswa kupongezwa kwa kazi nzuri aliyoifanya na uamuzi wa kishujaa kujaribu akiamini atafanikiwa.

Huenda bao hilo la Okwi likazua kila aina ya tafrani na hasa upande wa Yanga, kitu ambacho kinaweza kisiwe sahihi.

Kikubwa ni kukubali kama ambavyo tulikubali ubora wa bao la Jaja. Kwamba kweli, Okwi amefunga bao bora kabisa, bao linaweza kuwa funzo kwa washambuliaji makinda na wakongwe, kwamba umakini, ujanja, wepesi alioufanya ni sehemu ya kufanya kwake vizuri na kuweza kufunga.

Uamuzi wa kuthubutu, pia ni jambo lililomsaidia Okwi kufunga. Angehofia lawama, basi asingeweza kupiga mpira ule. Lakini aliamini angefanikiwa, akatenda na ikawa. Wachezaji wengine wanaweza kujifunza kupitia yeye kwamba uthubutu ni kwanza, halafu mafanikio yanafuata.

Bao la Okwi ni bora, ubora wa bao hilo ni maswali ya soka ya Tanzania ilipofikia na washiriki wake na kama kutakuwa na mabao mengi ya kiwango hicho, basi ni kipimo tosha kuwa tumeanza kupanda.