KMC YAZIPIGIA HESABU POINTI TATU ZA NAMUNGO FC

UONGOZI wa KMC umesema kuwa kwa sasa hesabu zao ni kupata pointi tatu muhimu kwenye mchezo wao wa tatu utakaochezwa leo uwanja wa Azam Complex.

KMC iliyo chini ya Kocha Mkuu, Jackson Mayanja imepoteza michezo yake miwili ilianza mbele ya Azam FC ilifungwa bao 1-0 uwanja wa Uhuru na ilipoteza kwa kufungwa mabao 2-0 dhidi ya Coastal Union, Mkwakwani.

Akizungumza na Saleh Jembe, Ofisa Habari wa KMC, Anwar Binde amesema kuwa kwa sasa tayari makosa ya awali yamefanyiwa kazi wana imani ya kupata pointi tatu mbele ya Namungo.

“Tupo tayari kwa ajili ya mchezo wetu dhidi ya Namungo, michezo iliyopita hatukufanya vizuri kwa sasa tunatazama namna tutakavyorejea kwenye ubora wetu.

“Tunahitaji pointi tatu kwa wapinzani wetu na tunawaheshimu pia kwani wao hawajapoteza mchezo hata mmoja ila hilo halitupi taabu tutakuwa nyumbani tutapambana kushinda mashabiki watupe sapoti,” amesema Binde.