ISHU YA USUMBUFU MORRISON KIBOKO,WENGINE HAWA HAPA WALIKUWA KWENYE SARAKASI ZA USAJILI

 

UNAAMBIWA usajili una sarakasi nyingi kuliko zile ambazo wakati mwingine unakutana nazo ndani ya Ligi Kuu Bara ambayo imeanza kutimua vumbi Septemba 6..

Timu nyingi zilikuwa zinapambana kupata saini za wachezaji zipo ambazo ziliishia kuwaona wakitambulishwa kwingine na zipo ambazo ziliwakosa wachezaji wao kwenye timu zao.

Cheki namna sarakasi za usajili zilivyokuwa ndani ya Bongo, kwenye dirisha lililofunguliwa Agosti Mosi na kufungwa Agosti 31 namna hii:-

Paul Nonga

Mhambuliaji mpya wa Gwambina FC yenye maskani yake Mwanza,itashiriki Ligi Kuu Bara msimu wake wa kwanza baada ya kufanikiwa kupanda kutoka Ligi Daraja la Kwanza.

Vita yao ya kuwania saini ya Nonga ilikuwa dhidi ya Namungo FC ambao walimtumia nyota huyo nauli mwanzoni kabisa mwa mwezi Agosti ila aliwachunia kwa kuwa alikuwa ana dili tano mkononi akivuta picha wapi dau litakuwa kubwa.

Gwambina walipomfuata kabla hata wiki haijaisha alikubali kumwaga wino na kuamua kuwarudishia Namungo FC nauli ambayo ilikuwa ni laki moja.Kaibukia Gwambina akiwa mchezaji huru ambaye alikuwa anakipiga Lipuli FC na alifunga mabao 11.

Ibrahim Ame

Agosti 5 alimalizana na Simba, ila Agosti 4 inaelezwa kuwa aliletwa Dar na mabosi wa Yanga ili waongeze nguvu ndani ya kikosi chao kwa kuziunganisha pacha zile mbili kutoka Coastal Union.

Mchezo waliocheza Simba ni kusepa na Ame mpaka Kibaha, kisha wakarudi naye na kumpeleka Posta ambapo walimalizana naye kwa kumpa dili la miaka miwili, Yanga wakabaki kuwa mashuhuda wa pacha wa Bakari Mwamnyeto akiwa ndani ya Simba alipotambulishwa rasmi Agosti 16.

Bakari Mwamnyeto

Mzawa aliyesajiliwa kwa dau matata, Mwamnyeto ni namba moja. Inaelezwa kuwa Yanga walivunja benki kwa kutoa milioni 170 ili kumpata beki huyu chipukizi.

Simba walianza hesabu kitambo kuipata saini ya beki huyo. Habari zinaeleza kuwa gharama nyingi za awali zilikuwa zinatolewa na mabosi wa Simba, hawakuwa na chaguo waliposhtuka anaibukia Yanga, Agosti Mosi.

Bernard Morrison

Jamaa huyu msumbufu kinoma mpaka mwenyekiti wa Kamati ya Hadhi ya Wachezaji Tanzania, Elias Mwanjala aliweka wazi kuwa amewapa usumbufu mkubwa hasa kwa kesi yake kuhusu mkataba wake ndani ya Yanga.

Yanga ilikuwa inasema kwamba, ana mkataba wa miaka mwili huku mchezaji akisema kuwa ana mkataba wa miezi sita na umekwisha, kumwaga kwake wino Simba kuliongeza utata na kufanya mambo yawe makubwa.

Kesi ya shauri lake iliinguruma kwa muda wa siku tatu, kuanzia Agosti 10 mpaka Agosti 12 ilipotolewa hukumu ilieleza kuwa mkataba ulikuwa na mapungufu na kumfanya Morrison kushinda na kuwa ni mchezaji huru, ila kwa sasa ana kesi ya kujibu kwa nini alisaini dili Agosti 8 ndani ya Simba ilihali alikuwa ana kesi ya kimkataba.Kesi yake imepelekwa Kamati ya Maadili ya Wachezaji.

Awesu Awesu

Kiungo huyu mwenye rasta rekodi zinaeleza kuwa amefunga jumla ya mabao saba, sita ndani ya ligi na moja kombe la Shirikisho aliwatungua Yanga, Uwanja wa Mkapa.

Yanga walikuwa na mpango wa kuipata saini yake na mchezaji alikubali kutua, kabla hawajamalizana naye, mabosi wa Azam FC waliibuka naye na kumtangaza ndani ya kikosi chake kwa kumpa dili la miaka miwili Julai 30, Yanga wakamaliza hasira kwa kuinasa saini ya Zawadi Mauya na kumtambulisha Julai 31.

Ally Niyonzima

Bado Azam waliwazidi ujanja tena Yanga kwa kuwapoteza mbele ya Niyonzima ambaye alikuwa amekubali kutua Yanga.

Akiwa zake Rwanda, mabosi wa Azam wakamfungia safari na kumshusha Dar fasta na kumpa dili la miaka miwili,Agosti Mosi akavishwa jezi ya Azam FC na tayari yupo zake Chamazi kwa sasa.

Wazir Junior

Hapa sasa Yanga walicheza kinoma kwa kuwapoteza mazima Azam FC.Hesabu za Azam zilikuwa kuinasa pia saini ya mchezaji wao wa zamani, Waziri akiwa kwenye majukumu yake ya mbele ya Ihefu FC, Agosti Mosi, tayari Azam FC walikuwa ndani ya uwanja na Yanga pia.

Hapa machale kwa Yanga yalianza mapema na kuamua kumshtua kiongozi mmoja wa Mbao ambaye alimbeba mchezaji mpaka chooni, huko alitoa jezi na kutupia viwalo vingine akatoka kininja na kupelekwa hotelini, Azam walisubiri mpaka wakasubiri ngoma ikawa nzito.Wanakuja kushtuka Agosti 2, nyota huyo mwenye mabao 13 anatambulishwa ndani ya Yanga.