KIUNGO YANGA ANA MATUMAINI KAMA YOTE

 

KIUNGO mshambuliaji wa klabu ya Yanga, Balama Mapinduzi amefunguka kuwa anaamini atarejea uwanjani akiwa bora zaidi baada ya kufanyiwa upasuaji wa enka kwa mara ya pili akiwa nchini Afrika Kusini alipokwenda kwa matibabu.

Balama aliyefanyiwa upasuaji huo wa pili Januari 11 mwaka huu aliondoka nchini Desemba 3, mwaka jana kuelekea Johannesburg, Afrika Kusini kwa ajili ya matibabu, kufuatia maendeleo yake baada ya kufanyiwa upasuaji wa kwanza kutoridhisha.

Balama alipata majeraha hayo mwezi Juni mwaka jana katika mazoezi ya Yanga iliyokuwa ikijiandaa na mchezo dhidi ya Ndanda ambapo kutokana na majeraha hayo amekuwa nje ya uwanja kwa miezi sita na kukosa michezo 27 ya Yanga.

Akizungumzia kuhusu hali yake Mapinduzi amesema: “Naendelea vizuri baada ya kufanyiwa upasuaji wa enka tarehe 11, ya mwezi huu wa Januari na nashukuru Mungu upasuaji huo ulienda vizuri.

“Nawashukuru wote ambao mmekuwa mkinitumia salamu za pole, lakini naushukuru uongozi wa Yanga pamoja na GSM kwa mchango wao mkubwa wa kuhakikisha narejea katika hali yangu ya kawaida, naamini baada ya kupona nitarejea uwanjani nikiwa bora zaidi”