KIBADENI ATOA SIKU TATU KWA NDUGU ZAKE DROGBA

Kocha Mkuu wa Simba, Abdallah Kibadeni ametoa siku tatu kwa wachezaji raia wa Ivory Coast wanaofanya majaribio pamoja na kikosi chake kuonyesha wanastahili kubaki au la.

Ingawa vyombo vingi vya habari vimeripoti wanatokea nchini Nigeria, Kibadeni alisema wamemuambia kwao ni Ivory Coast nchini anayetokea mshambuliaji nyota Didier Drogba.

“Lazima mambo yaende haraka kidogo, siku tatu ni kwa ajili ya kuwaangalia kama wataendelea kubaki hapa nasi kwa ajili ya majaribio zaidi.

“Kama nitaona hawawezi, basi mara moja nitawaondoa ili kupunguza watu hapa lakini kuendelea na programu yetu ya mazoezi na watakaoonekana wana msaada.

“Najua muda utakuwa mchache, lakini mambo mengi yako mbele yetu na tutakiwa kuyakamilisha, hivyo hatutakuwa na muda kabisa,” alisema Kibadeni.

Leo ni siku ya tatu akiwa kazini, Kibadeni ameendelea kufanya mazoezi na wachezaji wachache wa Simba huku asilimia kubwa wakiwa ni wanaofanya majaribio.