SALEH ALLY ARUDI ABAJALO, AHIMIZA MISAADA KUTOKA KWA WADAU

Nilianza kucheza soka mkoani Shinyanga, baadaye Mwanza lakini Dar es Salaam nimekulia Sinza. Kuna timu nyingi sana na karibu zote maarufu nilizitumikia.

Abajalo mojawapo, wakati huo kulikuwa na wachezaji wengi sana mahiri kama Modest, Kali Ongala na Matokeo waliokwenda Yanga, Midada na wengine waliokwenda Simba na timu nyingine za ligi kuu.

Pamoja na kucheza Abajalo, pia nilicheza Sinza Stars kwa kipindi kifupi, Sinza Express kwenye ligi ya kanda na baadaye Sinza Boys katika ligi daraja la tatu na mechi nyingine nyingi za mchangani kama Kinesi na nyingine.

Achana na hizo stori ndefu, Abajalo sasa inashiriki Ligi ya Mabingwa wa Mikoa, inahitaji msaada na Jumamosi itakuwa na kibarua kigumu dhidi ya Kariakoo ya Lindi ambayo katika mechi yao ya kwanza walitoka sare ya mabao 2-2 jijini Dar.

Mimi niliamua kujitolea, nilipeleka koni na baadhi ya nguo za juu za kuvaa kwa ajili ya wachezaji kupata joto.

Haukuwa msaada mkubwa, lakini ni vizuri sana hata wenye uwezo kidogo kujitokeza kuisaidia timu hiyo ambayo imekuwa kitengo cha kukuza wachezaji nyota jijini Dar.

ABAJALO WAKIJIFUA.. 

Najua wako wengi wanaweza kufanya hivyo kama Kali Ongala, Matokeo na wengine wengi sana na timu ikaendelea kupambana.

Najua mnaweza kufanya hivyo au kuwashawishi wengine, mmoja wa makocha wa timu hiyo ambaye amekuwa akionyesha kuijali bila kujali yuko wapi ni Abdallah Kibadeni.

Wengine pia mnaweza, Abajalo ni kati ya timu zilizotukuza, basi jitokezeni hata kwa mchango mdogo ndiyo utasaidia kuwepo mchango mkubwa.