MWILI WA MANGWEA KUWASILI NCHINI JUMAMOSI

 

Kama kila kitu kitakwenda vizuri, mwili wa msanii Albert Mangweha utawasili nchini Jumamosi.

Mmoja wa Watanzania wanaoishi nchini Afrika Kusini amesema, mipango inaonekana kwenda vizuri na serikali imekuwa ikitoa msaada.

“Kama mambo yote yakienda sawa, basi Jumamosi mwili utawasili Dar es Salaam. Lakini bado tunaendelea na michakato mingine.

“Walituambia mwili utafanyiwa uchunguzi leo, kesho Alhamisi majibu yote yatafanyika na maandalizi ya kuusafirisha yameishaanza ingawa Ijumaa tunategemea kila kitu kiwe kimekamilika kabla ya safari ya kumrudisha nyumbani Mangwea kuwa Jumamosi,” alisema Joseph mkazi wa Hillbrow.

“Kama kutakuwa na mabadiliko tutawaeleza lakini lazima tuwahi kumsafirisha kwa kuwa sheria za Afrika Kusini zinasema baada ya siku tatu, maiti inatolewa kweye mochwari ya hospitali ya serikali.

“Baada ya hapo, tutalazimika kumpeleka maiti katika hospitali ya kulipia mochwari. Hivyo tunajitahidi kufanya mambo mengi haraka."

Mangwea amefia Afrika Kusini, bado kumekuwa na utata kuhusiana na kifo chake huku taarifa za kwanza zikieleza kwamba alizidisha dozi ya dawa za kulevya.

Lakini subira ya ripoti ya daktari ndiyo inaweza ikaeleza kila kitu kuhusiana na kifo cha msanii huyo aliyekuwa na uwezo mkubwa wa ‘kutembea’ juu ya verse za hip hop, ka’Obama.