ANGALIA BEKI MPYA MRUNDI ALIVYOTUA SIMBA, AMTAKA DIDIER KAVUMBAGU WA YANGA

AKIONGOZANA NA MANEMBE PAMOJA NA MTU WA KAZI MEDDY

Beki mpya wa Simba raia wa Burundi, Kaze Gilbert maarufu kama Demunga, ametua kwa ajili ya kuichezea timu hiyo inayojiandaa na Ligi Kuu Tanzania Bara.

Mrundi huyo alitua jana kwenye Uwanja wa Ndege wa Kimataifa wa Julius Nyerere (JNIA) jijini Dar es Salaam majira ya saa 10:00 jioni kwa ndege ya Precision Air akitokea Burundi.

Beki huyo alipokewa na baadhi ya viongozi wa timu hiyo akiwemo Mjumbe wa Kamati ya Utendaji na Mwenyekiti wa Benchi la Ufundi la Simba, Danny Manembe pamoja na mpiganaji Meddy ambaye pia ni kiongozi wa Abajalo ya Sinza jijini Dar es Salaam.

 

AKIONGOZANA NA VIONGOZI HAO PAMOJA NA MWANDISHI WA CHAMPIONI, WILBERT MOLANDI 'BABA ANDY' (KULIA)

Mara baada ya kutua, alichukuliwa na viongozi hao na kuelekea hotelini kwa ajili ya kupumzika na kufanya mazungumzo ya kumsajili.

Akizungumza na Championi Ijumaa, Manembe alisema kuwa beki huyo ndiyo watakayefunga naye usajili kwa ajili ya msimu ujao wa ligi.

“Huyu Mrundi ndiye tunatarajia kufunga naye usajili kwa wachezaji wa kigeni na wazawa kwa ajili ya msimu ujao wa ligi. Tunatarajia kuingia naye mkataba wakati wowote kuanzia sasa baada ya kufikia muafaka,” alisema Manembe.

Akizungumza na Championi Ijumaa, beki huyo alisema: “Simba wameniita kwa ajili ya kufanya mazungumzo kabla ya kusaini, ninaamini tutafikia muafaka mzuri na nitasaini.

“Nipo tayari kukabiliana na washambuliaji wa timu pinzani (Yanga) ambao ninawafahamu, wapo baadhi ninawafahamu akiwemo Kavumbagu (Didier) ambaye ninacheza naye timu ya taifa, ninamjua, hivyo nimekuja kupunguza kasi yake,” alisema Gilbert maarufu kama Demunga.