KAPOMBE AWEKA REKODI UFARANSA

Beki Shomari Kapombe, leo anaweka rekodi mpya katika soka Tanzania pale atakapoanza kazi kwa mara ya kwanza kama mwajiriwa wa AS Cannes ya Ufaransa.

Kapombe anakuwa Mtanzania wa kwanza kucheza soka la kulipwa nchini Ufaransa, ingawa iko daraja la nne kwa sasa, lakini ni timu yenye historia kubwa katika soka nchini humo.

AS Cannes ni timu maarufu kwa ajili ya kukuza na kuuza wachezaji barani Ulaya na kati ya iliyowakuza ni viungo nyota duniani, Zinedine Zidane na Patrick Vieira waliowahi kutamba katika ligi kubwa kama England, Ufaransa, Italia na Hispania.

Kapombe amesafiri jana kutoka Uholanzi kwenda Ufaransa kwenda kujiunga na timu yake hiyo mpya, ikiwa ni siku moja baada ya klabu yake ya Simba kukubali kumuachia.

Simba imeamua kumuonyesha uungwana Kapombe lakini imewekeza kibiashara kwa kuwa kama atauzwa, itaingiza fedha kutokana na mauzo hayo.

Wakala wake, Denis Kadito, jana alithibitisha kuwa Kapombe ametua katika kikosi cha timu hiyo nchini Ufaransa na leo ataanza mazoezi.

“Kweli kesho (leo) ndiyo ataanza mazoezi na timu yake mpya, hivyo ni kitu kizuri ambacho tunapaswa kuamini siku moja kitazaa matunda.

“Mimi nawashukuru Simba kwa kuwa waelewa katika suala hili ambalo lilihitaji utulivu sana. Sasa kazi ni kwake Kapombe kupambana kupata namba na baadaye timu nyingine nzuri zaidi,” alisema Kadito.

Kapombe alifuzu majaribio katika timu hiyo wakati zaidi ya wachezaji 10 kutoka Ulaya wenye asili Afrika Magharibi walikuwa wanawania kusajiliwa.