REKODI MPYA SALEHJEMBE, BLOG YA KWANZA KURIPOTI LIVE KOMBE LA FA LA UJERUMANI

Blog hii leo imeweka rekodi kuwa ya kwanza nchini Tanzania kuripoti Live mechi ya Kombe la Ujerumani maarufu kama Germany DFB Polka, mechi iliyomalizika hivi punde.

Hili ni kama Kombe la FA kwa England na ilikuwa kati ya timu ya daraja la tano ya Bahlinger SC dhidi ya wageni wao Bochum.

Bochum ambao wanacheza Ligi Daraja la Pili Ujerumani au Bundesliga 2, wameibuka na ushindi wa mabao 3-1.

Hadi Mapumziko, Bochum walikuwa wanaongoza kwa mabao mawili yote yakiwa yamefungwa kwa ustadi mkubwa na Piotr Cwielong katika dakika ya 18 na 31.

Kipindi cha pili, wenyeji walionekana wamepania kuwainua mashabiki wao waliojitokeza kwa wingi uwanjani.

Lakini bado wakashindwa kuhimiliki mikiki ya Bochum baada ya kufungwa bao la tatu katika dakika ya 63, safari hii akiwa ni Danny Latza.

Latza aliuwahi mpira wa juu na kuuparaza kwa kichwa ukawapita mabeki pamoja na kipa na kuandika bao la tatu.

Wenyeji Behlinga walionekana wamepania kutotaka kuwaangusha watu wao baada ya kufanikiwa bao la kufutia machozi lililofungwa na Goppert katika dakika ya 90.

Hali ya Uwanja wa Kaiserstuhl ilikuwa nzuri, watu kibao walijitokeza na shangwe zilikuwa za kutosha lakini hata hivyo timu yao ikang’olewa.

Mwishoni ilikuwa raha zaidi, kwani pamoja na kufungwa, wachezaji walizunguka uwanja mzima wakiwapigia makofi mashabiki kuonyesha wanashukuru nao walijibu mapigo namna hiyo kuonyesha walikuwa pamoja nao.