HOJA YANGU: UCHAGUZI MKUU TFF, SIMBA Vs YANGA SIKU MOJA! HAPA KUNA AJENDA YA SIRI

MWENYEKIKTI wa Kamati ya uchaguzi ya Shirikisho la Soka Tanzania (TFF), Hamidu Mbwezeleni ametangaza uchaguzi mkuu wa shirikisho hilo utafanyika Oktoba 20, mwaka huu.

Kauli hiyo ya Mbwezeleni ni sawa na hatua moja upya kwa wapenda soka nchini, kwamba angalau siku ya uchaguzi imejulikana na sasa mijadala inaanza kupaa.

Kwanza ni kuhakikisha haki inatendeka na hakuna mambo yatakayosababisha msigano kama ilivyokuwa awali, lakini hata wagombe lazima wakubali kwamba kuna kufuatwa kwa sheria.

Sitegemei mtu asiyekuwa na vigezo akienguliwa eti ionekana ameonewa kwa kuwa kama pia atapata nafasi siku zijazo tutahoji kwamba ilikuwaje akaruhusiwa akapita.

Kikubwa hasa ambacho nimelenga kujadili leo ni kuhusiana na suala la kamati hiyo chini ya TFF kuamua kuiweka siku ya uchaguzi mkuu siku ambayo Simba itaikaribisha yanga kwenye Uwanja wa Taifa jijini Dar es Salaam katika mechi ya Ligi Kuu Bara.

Kwangu naona ni kichekesho, pia naona kumbe hakuna tofauti kati ya ujanjaujanja wa kubabaisha mambo kati ya TFF na uongozi wa Simba ulivyofanya katika mikutano yake miwili.

Simba imekuwa ikitumia staili ile ya kizamani, viongozi wa kizamani ambao huwapumbaza wanachama wao katika mikutano muhimu ya mwaka kwa kuhakikisha siku hiyo kuna mechi.

Ntakukumbusha mkutano uliopita wa wanachama wa Simba, pamoja na uongozi kuwa na mapungufu mengi, Mwenyekiti Ismail Aden Rage aliuondesha mbiombio, ukiwa umepangiwa vitu kibao vya kubabaisha.

Kama haitoshi, Simba siku hiyo ilikuwa inacheza mechi ya kirafiki dhidi ya URA ya Uganda. Hivyo wanachama wake walikuwa na hofu kupita kiasi, walitaka mkutano uishe ili wakaone mechi na ‘janja’ ya Rage akawaambia kila aliyekuwa na ‘beji’ ya kuingilia kwenye mkutano huo, basi ndiyo kiingilio cha mechi.

Baada ya hapo, hakuna aliyekuwa amehoji kuhusiana na mambo muhimu ya mapato na matumizi au mwenendo wa klabu kwa sababu ya mechi ya kirafiki.

Kamati hiyo ya uchaguzi ya TFF pia imeangukia huko, sasa imeweka uchaguzi mkuu, siku ambayo Simba na Yanga zinapambana Uwanja wa Taifa.

Kila mmoja anajua namna kunavyokuwa na presha kubwa siku ya mechi hiyo, kila mmoja anataka kuwahi uwanjani na hii ni sehemu ya kufanya mambo yaende haraharaka bila ya kutafakari kwa kina.

Sioni kama kulikuwa na ulazima huo, ingewezekana angalau siku moja kabla uchaguzi huo ungefanyika na baada ya hapo mechi ikafuatia. Lakini watu kuchagua viongozi huku wakiwaza watakwenda uwanjani saa ngapi, tena wakiwa wanatakiwa kuwahi si sahihi.

Ndiyo maana Napata hofu hapa kwamba kutakuwa kuna kitu kinasukwa ambacho pia lazima hakitakuwa sahihi kwa kuwa kinalenga kusaidia kitu au upande fulani.

Uchaguzi wa TFF ni kitu muhimu muhimu katika soka ya Tanzania, uongozi unaoingia unakuwa madarakani kwa miaka minne, si kitu kidogo. Sasa kuna sababu gani ya kuwalazimisha watu wakifanye kwa hofu au kwa kulipua?

Kwani ingepangwa siku moja kabla au baada, kungekuwa na tatizo gani? Nafikiri ni wakati wa wahusika kuangalia kwamba tumepiga hatua na lazima tuwe na fikra sahihi zinazolenga kujenga.

Upuuzi ambao umekuwa ukifanywa na klabu zetu kwa lengo la kuwapumbaza wanachama ambao wamekuwa wakikubali kilaini, leo unaingia tena hadi kwenye shirikisho ambalo ni baba na linatakiwa kuonyesha tofauti, hii si sahihi.