KOCHA MKUU YANGA APATA TIMU CHILE

Wakati bado akiwa na kibarua Yanga, Kocha Mkuu, Ernie Brandts amepata timu ambayo inataka akafanye kazi nchini Chile.

Taarifa zinaeleza kuwa timu hiyo kutoka Chile imepiga simu katika klabu ya APR ya Rwanda ikitaka mawasiliano na Brandts.

Mmoja wa viongozi wa APR ameliambia gazeti hili kuwa klabu hiyo ya Chile imekuwa ikiwasumbua kutaka mawasiliano na Brandts nao walichofanya ni kumuunganisha nao.

“KIla siku wanasema wanataka kuzungumza naye, tuliwaambia wapige Yanga. Lakini wao wameendelea kupiga hapa, tumewapa namba wamtafute, wakasema haipatikani. Tumetafuta na kuwapatia nyingine sasa hatujui kama wamezungumza naye,” alisema ofisa huyo aliyekataa kutajwa kuhusiana na hilo kwa madai haliihusu klabu yake.

Alipoulizwa Brandts kuhusiana na hilo, akasema hivi karibuni hajawahi kupata simu kutoka Amerika Kusini. Lakini kabla aliwahi kuwasiliana na wakala aliyemuambia jambo hilo.

“Hakuna aliyenipigia wakati huu, lakini kabla sijakwenda Ujerumani kuna wakala aliwasiliana na mimi na kunieleza kuna timu ya Amerika Kusini inanihitaji,” alisema na alipoulizwa uamuzi wake ukoje.

“Niliwaeleza bado nina mkataba na Yanga, hivyo tungeweza kuzungumza wakati mwingine na kujua nini cha kufanya.”

Brandts ameipa Yanga ubingwa wa Tanzania Bara, lakini kabla alikuwa kocha wa APR ambayo aliibebesha ubingwa wa Rwanda na makombe mengine mawili.