COSTAL UNION YAZIDI KUIKOMALIA YANGA SUALA LA VURUGU

 

Uongozi wa klabu ya Coastal Union umezidi kuutia presha ule wa mabingwa Tanzania Bara, Yanga kutokana na ukimya wao.

Mkurugenzi wa Ufundi wa Coastal Union, Mohammed Bin Slum ambaye pia ni mdhamini wa klabu hiyo amesema anashangazwa na uongozi wa Yanga kuendelea kukaa kimya.

“Kilichotokea hakikuwa kitu cha kiungwana, hivyo tulitegemea kuona uongozi wa Yanga unazungumza jambo kwa lengo la kukemea.

“Kuendelea kukaa kimya ni sawa na kuonyesha hawajali na ninashangazwa na hili,” alisema.

Mashabiki wa Yanga walilishambulia basi la Coastal Union wakati likitoka uwanjani baada ya mechi ya Ligi Kuu Bara ambayo ilimalizika kwa sare ya mabo 1-1.

Coastal Union walisawazisha katika dakika ya 90 kupitia mkwaju wa penalti wa nahodha Jerry Santo, hali iliyowakasirisha mashabiki hao wa Yanga.

Mchezaji mmoja wa Coastal Union alijeruhiwa mara baada ya basi hilo kushambuliwa.