METODO: MSIFICHE, KUNA WACHEZAJI WANAWADAI, WALIPENI

Kana utaamua kuzungumza kuhusu matatizo yanayoendelea katika timu mbalimbali zinazoshiriki Ligi Kuu Bara, basi huenda usipate nafasi ya kuzungumza mambo mengi ya msingi.

Matatizo ni mengi sana lakini viongozi wamekuwa wakifanya kila namna kuhakikisha wanayaziba ili kuonekana walipo, kila kitu kimetulia.

Walipo binadamu, matatizo hayakosi kwa kuwa ‘wana undugu’, lakini yako yale ambayo yanaweza yakatatuliwa na kufanya mambo yakaenda vizuri.

Timu nyingi zinazoshiriki Ligi Kuu Bara, zikiwemo kongwe za Yanga na Simba, zina madeni kwa kuwa wachezaji wake wanadai fedha za usajili.

Fedha za usajili mara nyingi hutolewa kwa mafungu na nyingine huwa ni ahadi tu, lakini limekuwa ni tatizo kubwa kuwachezaji kupata haki zao baada ya usajili kukamilika.

Mambo mengi hasa katika timu hizo kongwe hayako katika mpangilio sahihi, wanaofanya kazi hata wao wanajua lakini wanalazimika kuonyesha mambo yanakwenda vizuri kwa kuwa wao ni viongozi.

Kuficha upuuzi hakuwezi kusaidia ujenzi mzuri wa ukuta bora uliolenga kufanikisha busara. Hakuna ubishi busara ina sehemu husika, inawezekana wakati mwingine haihitajiki na utekelezaji unatakiwa kuchukua nafasi.

Hakuna busara inayohitajika kwa viongozi wanaodaiwa na wachezaji zaidi ya kuwalipa tu, wanatakiwa kufanya utekelezaji au kutimiza ahadi walizowaahidi wachezaji wao.

Wachezaji wengi wamekuwa wakilalama, wanasema malalamiko yao chinichini kwa hofu ya kutoonekana wasaliti au kuingia katika migogoro na viongozi wao.

Wengi wao wamekuwa wakikata tamaa na kuona kama wanadanganywa, lakini wakweli wamekuwa wakionekana wasaliti bila ya kujali wanayodai ni  haki yao.

Hivyo ni vema viongozi wa timu zote zinazoshiriki ligi kuu wakaliangalia hilo, walipeni wachezaji fedha zao kama mlivyoahidi ili kujenga morali sahihi ya timu. Lakini hakuna sababu ya kulazimisha uadui miongoni mwa wale wanaodai haki zao.

Lazima mjue hata kama nyie ni viongozi, basi wachezaji nao wana haki zao na ndiyo wanaouunda kundi linawapa nyie vyeo vya kuitwa viongozi.

Kawaida jamii imekuwa ikichukua wasema kweli, isipokuwa watu wachache tu wanaojua kwamba ukweli ni kitu kizuri na watu wanapaswa kuwa huru kuzungumza kitu chenye chembe za ukweli.

Ukitaka kuona kama ukweli unaonekana si kitu kizuri, angalia pale klabu zinapoguswa, mfano wasikie mchezaji analalamika hajalipwa, au kuelezwa kwamba wamechelewesha fedha za malipo fulani wanazodaiwa na wachezaji wao.

Nguvu ya kukanusha au kujibu inakuwa kubwa sana, vizuri nguvu hiyo ingetumika kuhakikisha wanaodai wanalipwa ili kuwajenga vizuri kisaikolojia katika hali ya ushindani.

Mchezaji anayedai, mwenye hofu ya kulipwa na hofu ya kuonekana adui kama ataulizia zaidi ya mara mbili kuhusu haki haki yake, atacheza vipi mpira akiwa na ari ya ushindi? Mwisho mnajisahau na kuwaangushia lawama tu. Kukubali ni sehemu ya kujifunza hasa kama ukiona kuna upungufu, hivyo ili wasawadai, basi walipeni haki hao ili muwe katika mstari mzuri wa kujaza nia na akili zenu katika kazi yenye mafanikio.