LOGARUSIC ASEMA WALA HANA MPANGO WA KUMTIMUA MWOMBEKI

MWOMBEKI AKIPAMBANA

Kocha Mkuu wa Simba, Mcroatia, Zdravko Logarusic, amefunguka na kuainisha sababu zinazomfanya asimchezeshe na kumjumuisha kikosini mshambuliaji wake Betram Mwombeki.

Loga alisema kwamba huwa anashindwa kumtumia mchezaji huyo si kwa sababu nyingine binafsi wanazohisi watu ila kila anapotaka kumtumia humkuta hayupo fiti kutokana na kuwa majeruhi mara kwa mara na hivyo huamua kumweka pembeni na kuwatumia wengine.

“Suala lipo hivi, nashindwa kumchezesha Mwombeki kwa sababu hayupo fiti, haiwezekani kila mara mchezaji anakuwa majeruhi halafu bado nimwamini kwa asilimia zote na kuendelea kumpa nafasi kwenye mechi.

“Anapokuwa majeruhi na kukosekana mazoezini nashindwa kumuona kama yupo fiti kiasi gani kwa ajili ya mchezo unaokuja pia anaelewana na wenzake kwa kiasi gani, hii inanisaidia mimi kujua nimpange acheze na nani na kwa mfumo upi.

“Sasa Mwombeki kila baada ya mechi moja au kila baada ya mazoezi ya siku mbili au tatu anaumia, mtu kama huyo pia anakosa pumzi  kwenye mechi kwa kuwa hana maandalizi ya kutosha.

“Hali hii inanifanya nimpange mchezaji mwenye uhakika wa kucheza dakika 90 kuliko yeye ambaye atacheza kwa dakika 20 au 25 na ni lazima awe mchezaji wa dakika hizo kwa kuwa ana mazoezi hafifu,” alisema Loga na  kuongeza:

“Sidhani kama atapata nafasi kwenye kikosi changu,” alisema Loga.