YAGUNDULIKA KUNA ZENGWE LA KUTAKA KUIVUNJA BODI YA LIGI

YAHAYA

Katika hali isiyo ya kawaida inayotokana na mgogoro wa kifedha uliopo ndani ya Shirikisho la Soka Tanzania (TFF), huenda Bodi ya Ligi Kuu Tanzania Bara ikavunjwa.

Bodi ya Ligi iko chini ya Yahya Mohammed ambaye ndiye mwenyekiti wa kwanza aliyeshinda uchaguzi.

 Chanzo cha ndani kutoka bodi hiyo kilisema kuwa kwa sasa hali siyo shwari kabisa na muda wowote kuna uwezekano wa bodi hiyo kuvunjwa kutokana na kuwa na mgororo wa masuala ya kifedha uliopo baina yake na shirikisho, kitu ambacho kinaendelea kwa sasa na si kizuri.

Chanzo hicho kilisema kuwa kutokana na mgawo mdogo ambao wanaupata TFF, pande hizo mbili zimeshindwa kuelewana na kupelekea kuwepo kwa dalili za uwezekano wa kuvunjwa kwa bodi hiyo.

“Ni kweli hapo Bodi ya Ligi kwa sasa kuna mgogoro kati yake na Shirikisho la Soka Tanzania na tatizo kubwa ni masuala ya fedha ndiyo yanayotukwamisha hasa kwenye mgawanyo na huenda bodi ikavunjwa muda wowote na kutokuwepo tena,” kilisema chanzo.

Championi lilimtafuta Rais wa TFF, Jamal Malinzi, kuzungumzia suala hilo na alisema kuwa hana taarifa ya namna hiyo.

“Sina taarifa ya namna hiyo na ndiyo kwanza nakusikia wewe unazungumzia suala hilo, ladda kama kuna jambo jingine,” alisema kisha akakata simu.