BAYERN MUNICH YAIFANYIA MBAYA MAN UNITED, YASONGA NUSU FAINALI

 Mabingwa watetezi wa Ulaya, Bayern Munich wamesonga mbele hatua ya nusu fainali kwa kuing’oa Man United.

Munich wameichapa Man United kwa mabao 3-1 katika mechi yao ya pili ya robo fainali, baada ya sare ya mabao 1-1 kwenye Uwanja wa Old Trafford.

United ndiyo walikuwa wa kwanza kupata bao kupitia Patrice Evra ambaye aliachia shuti kali katika dakika ya 57 baada ya kupokea pasi ya Valencia.

Bayern wakasawazisha sekunde 22 baadaye kupitia Mandzukic aliyepiga kichwa mbele ya Evra kabla ya Muller kufunga bao la pili katika dakika ya 68.

Robben aliyekuwa akiiyumbisha safu ya ulinzi ya Man United tokea mwanzo wa mchezo, alifunga bao la tatu katika dakika ya 76 baada ya Vidic kumruhusu aingie ndani na kupiga shuti lililojaa wavuni baada ya kuguswa na beki huyo.

Baada ya mabao hayo ya haraka, Man United walionekana kuzidi kupoteana ukilinganisha na awali, walianza mechi kwa nidhamu ya juu na kuwazuia Bayern kupata bao.