WAHISPANIA SASA WANAENDESHA SOKA ULAYA

Na Saleh Ally

MIAKA minne iliyopita, wachezaji kutoka England, Brazil na Italia ndiyo walikuwa na soko kubwa katika soka.

Soka la kimataifa, ngazi ya ligi zenye nguvu kama Premier League (England), Serie A (Italia), Bundesliga (Ujerumani), La Liga (Hispania) na League 1 (Ufaransa).

Wachezaji kutoka mataifa hayo walipiga hatua moja kutoka huku, kwenda upande mwingine na wakaendelea kufanya vizuri.

Pia kulikuwa na kundi la mwisho, hili lilijumuisha wachezaji kutoka Ulaya Mashariki kama Serbia, Jamhuri ya Czech, Croatia na kwingine, pia wale waliotokea barani Afrika, hawa walionekana wachezaji wanaocheza soka kwa ajili ya kulainisha maisha.

Yaani wanatokea kwenye maeneo ambao maisha yako chini, ilikuwa ni lazima wapambane kupata maisha bora kupitia soka.

Hispania ndiyo walishangaza wengi, bila ya kujali watapata fedha nyingi au kidogo, waliendelea kubaki kwao Hispania.

Wachezaji wengi wa Hispania, ndoto zao za juu zilikuwa ni kucheza ligi ya kwao, La Liga, Ligi ya Mabingwa Ulaya au michuano iliyo chini ya Shirikisho la Soka Ulaya (Uefa) au lile la kimataifa (Fifa).

Hawakuwa na haja ya kwenda England au Italia, wengi walibaki nyumbani licha ya kuwa na vipaji vya juu.

Wachache au asilimia ndogo sana ndiyo waliokuwa tayari kutoka na kwenda kucheza soka kwenye nchi za Ulaya hasa England na Ujerumani.

Wachezaji kutokea Hispania walionekana wasingeweza lolote, tena hata kidogo kwa kuwa ni ligi inayojumuisha nguvu na kasi, vitu ambavyo walionekana, hawana.

Leo mambo yamebadilika, Hispania ni kati ya mataifa yanayotawala soka Ulaya na duniani kote.

Achana na timu yao kupokonywa Kombe la Dunia, hiyo haizuii wao kuwa bora lakini wachezaji wao kibao wanang’ara katika ligi mbalimbali kubwa.

Safari hii wako hadi ndani ya England na utaona imefikia hadi mchezaji kutoka England kuaminiwa kucheza namba sita kwa mfano Mikel Arteta aliyefanya vizuri akiwa na Everton na baadaye Arsenal.

Kabla ya hapo, Arsenal ilikuwa na Cesc Fabregas ambaye sasa anaendelea kufanya vizuri Chelsea. Manchester United imemtwaa kiungo Ander Herrera na Juan Mata kwa kazi kama hiyo.

Cheki na Santi Cazorla anavyofanya vizuri na Arsenal, lakini Manchester City wamechukua ubingwa wakiwa na wapishi wawili wa Kihispania, David Silva na Jesus Navas.

Muangalie kijana aitwaye Suso aliye Liverpool, ni matata na ana uwezo mkubwa sana.

Hao ni viungo, ukipanda kwa washambuliaji, Fernando Torres ambaye aliwashangaza wengi akiwa na Liverpool kabla ya kwenda Chelsea ambako mambo yalikataa, sasa yuko Italia.

Chelsea wamemchukua Diego Costa, anaonekana ni mtambo, anatishia amani za mabeki, makipa na hata ajira za makocha.

Ukirudi kwa walinzi, wako kama Cesar Azpilicueta aliye Chelsea, lakini Liverpool nayo imewajaza akina Jose Enrique, Alberto Moreno na Manquillo.

Kuna wachezaji zaidi ya 33 kutoka Hispania ambao wanacheza ligi za juu kwenye nchi 13 za Ulaya.

Wengi wao ni tegemeo katika timu wanazozichezea na wanaanza na nchi karibu zote hodari kwenye mchezo huo kama England, Italia, Ujerumani, Ufaransa, Ureno, Ugiriki, Urusi, Uturuki na kwingineko.

Dalili zinaonyesha kuwa ndani ya miaka miwili kumekuwa na kasi kubwa ya wachezaji wa Kihispania kusambaa kwenye nchi za Ulaya. Dalili kuwa wanaweza kuwa watawala wa mchezo huo.