EXCLUSIVE: MAAJABU YA TFF, SASA INATAKA SIMBA&YANGA ZIKATWE FEDHA ZA VODACOM, AZAM TV IPEWE YENYEWE

MWESIGWA

Ukishangaa ya usiyemjua, utayaona ya TFF. Sasa imeibuka na jipya na kutaka Yanga, Simba na klabu nyingine 12 za Ligi Kuu Bara, zikatwe 5% ya fedha za udhamini, ziingie TFF.

Uongozi wa TFF umeandika barua kwenye bodi ya ligi ukitaka ulipwe 5% ya fedha za udhamini kutoka Vodacom na Azam TV ipewe yenyewe.

TFF imetaka fedha hizo ili izitumie kwa ajili ya maendeleo ya soka au timu ya taifa.

Lakini hali imezishitua baadhi ya klabu ambazo zimeanza kuhoji chinichini kuhusiana na suala hilo.

Suala hilo la kushangaza kama litapita litakuwa ni la aina yake kwa klabu kutoa fedha zao za udhamini na kulipa shirikisho.

Suala hilo ambalo limeonekana litakuwa la kwanza kufanyika katika ulimwengu wa soka, bado haijajulikana kama limepitishwa.

Barua hiyo ya Septemba 19 kutoka TFF ikiwa imesainiwa na Katibu Mkuu, Mwesigwa Celestine, imeitaka bodi ya ligi kupeleka fedha hizo za klabu 14 za ligi kuu kwenye akaunti ya shirikisho hilo.

TFF imesema fedha hizo zitaenda kwenye akaunt ya Maendeleo ya Michezo Tanzania ambayo hushughulikia timu ya taifa.

(Kimantiki Vodacom na Azam TV hazidhamini timu ya taifa, inadhaminiwa na Kilimanjaro Beer.)