MSUVA, NGASSA WAANDALIWA WAIMALIZE SIMBA TAIFA

NGASSA, MMOJA WA VIUNGO WENYE KASI ZAIDI AFRIKA MASHARIKI NA KATI.

Kocha Mkuu wa Yanga, Mbrazil, Marcio Maximo, amewaandaa viungo washambuliaji Mrisho Ngassa na Simon Msuva kuwa ndiyo chachu kubwa ya ushindi wake dhidi ya watani wao wa jadi Simba, katika mchezo wao wa Oktoba 18, kwenye Uwanja wa Taifa.

Simba na Yanga watakutana katika mchezo wa raundi ya nne wa Ligi Kuu Bara, huku zikiwa na kumbukumbu ya sare ya bao 1-1, katika mchezo wao wa mwisho wa ligi hiyo walipokutana katika uwanja huo msimu uliopita.

Katika mazoezi ya Yanga ambayo yanafanyika kwenye Uwanja wa Boko Veterani uliopo Boko nje kidogo ya Jiji la Dar, Maximo ameonyesha kuwatumia zaidi viungo wake hao wenye kasi kupiga mipira ya krosi kwenda kwa washambuliaji wake wanaoongozwa na Mbrazili, Geilson Santos ‘Jaja’ na kuwapa kazi rahisi ya kupachika mipira wavuni.

Katika mazoezi hayo, Maximo alitumia muda mwingi kuwapa viungo hao mazoezi maalum ya kupiga krosi zitakazoleta madhara katika lango la wapinzani wao huku akiwataka washambuliaji kuzitumia vizuri krosi hizo.

Mbali na Msuva na Ngassa waliolifanya zoezi hilo kwa muda mrefu na kwa ufasaha mkubwa, Maximo aliwatumia pia wachezaji wengine katika zoezi hilo ili nao pia wapatapo nafasi ya kupiga krosi wapige zenye madhara. Wachezaji waliofanya zoezi hilo ni pamoja na Andrey Coutinho, Nizar Khalfan, Hussein Javu na beki Edward Charles.