BADO MAMBO HAYAJATULIA KWA KOCHA LOUIS VAN GAAL

MAMBO bado siyo mazuri kwa Kocha wa Manchester United, Louis van Gaal, baada ya timu yake hadi sasa kushindwa kwenda na kasi ile aliyokuwa anaitaka.

Kocha huyo awali alisema kuwa timu yake inaweza kuzoea kasi anayoitaka yeye baada ya kupita miezi mitatu, lakini hadi sasa linaloonekana kuwa tatizo kubwa kwake ni majeruhi na siyo hali ya wachezaji kuzoea tena.

Wachezaji wa Manchester United wamekuwa wakisumbuliwa na majeraha mara kwa mara msimu huu jambo ambalo linazidi kumweka kwenye wakati mgumu kocha huyo raia wa Uholanzi.

Kwenye safu ya ulinzi ya timu hiyo wachezaji wake Jonny Evans, Marcos Rojo, Tyler Blackett na Phil Jones kwa sasa wapo nje kutokana na majeraha huku Chris Smalling akiwa fiti lakini atashindwa kucheza kutokana na kuwa na kadi nyekundu.

Kocha huyo amekuwa akilazimika kuwatumia wachezaji makinda Paddy McNair pamoja na kiungo Daley Blind kama mabeki kwenye timu hiyo.

Lakini wakati mashabiki na wachambuzi wengi wa soka wakitazama tatizo hilo, wamesahau kuwa tatizo kubwa zaidi kwa United kwa sasa lipo kwenye safu ya ushambuliaji.

Kukaa nje kwa mshambuliaji Radamel Falcao kutokana na kusumbuliwa na majeraha ni tatizo lingine kubwa sana.

Staa huyo raia wa Colombia, aliichezea timu hiyo mchezo wa mwisho wakati walipopata sare ya mabao 2-2 dhidi ya West Brom, kwenye mchezo huu alifanikiwa kucheza kwa dakika 18 tu akitokea kwenye benchi.

Taarifa zimekuwa zikisema kuwa, mchezaji huyo amekuwa akisumbuliwa na tatizo la goti siyo leo tu bali kwa muda mrefu.

Inaelezwa kuwa staa huyo aliyesajiliwa kwa mkopo akitokea Monaco ya Ufaransa, amekuwa akiwekewa barafu kwenye goti hilo kila anapomaliza mazoezi ya timu hiyo hata anapoonekana kuwa fiti, jambo linalozidi kutoa ishara mbaya zaidi.

Hali inaonekana kuwa bado siyo nzuri kwa mchezaji huyu na suala la Manchester kumsajili kwa mkopo walifanikiwa kucheza kamari yao vizuri lakini isiyo na faida.

Huko nyuma, Falcao amewahi kusumbuliwa na tatizo la goti mara tatu tofauti, kwa mara ya mwisho ulikuwa msimu uliopita ambapo alikaa nje ya uwanja kwa miezi nane na kushindwa kwenda kwenye Kombe la Dunia.

 Ni sahihi kusema kuwa United walicheza kamari yao vizuri kumsajili kwa mkopo mchezaji huyo kwenye siku ya mwisho kabisa ya usajili kuliko wangetoa kitita kikubwa na kumchukua moja kwa moja.

Lakini kwa kuwa walilipa kitita cha pauni milioni 16, unaweza kusema kuwa ni mkopo usio na faida kama atakaa nje kwa muda mrefu kama inavyotarajiwa.

Tatizo linalokuja sasa ni kwamba inaonekana kuwa Falcao hana shida sana kwenye goti lake kama wengi wanavyofahamu, bali kwa sasa anasumbuliwa na misuli ya nyuma ya mguu.

Kocha wa United, ameongeza hofu baada ya kunukuliwa na Taasisi ya Habari ya la Reuters, akisema kuwa hana uhakika kama mchezaji huyo ataweza kuichezea timu hiyo tena msimu huu, kutokana na kusumbuliwa na nyama hizo.

“Siwezi kusema kuwa Falcao atarudi lini uwanjani, inategemea na hali yake ya majeraha itakavyokuwa, kwa sasa anasumbuliwa na nyama za nyuma za mguu, goti siyo sana.

  “Lakini hata alivyokuwa fiti wakati mwingine tulikuwa tunashindwa kumtumia kwa kuwa alikuwa amekaa nje kwa muda mrefu akisumbuliwa na majeraha, hivyo tatizo kubwa lilikuwa kwenye balansi yake uwanjani,” alisema van Gaal.

Hali halisi inaonyesha kuwa, majeraha ya mchezaji huyo kwa sasa ni hatari, hawezi kuwa faida kwenye kikosi cha United ambayo inamhitaji mtu kama huyo kwa nguvu kubwa kwa sasa.

Ukweli ni kwamba kwa sasa safu ya ushambuliaji ya United siyo bora kwani kufahamu kuwa wanaweza kumpata Falcao ndiyo maana United waliamua kumuachia Danny Welbeck na Javier Hernandez wakaondoka.

Tatizo limekuwa kubwa kwao kwa kuwa mshambuliaji wao waliyekuwa wanamtegemea msimu huu Robin van Persie anaonekana kuwa chini sana kwa kiwango chake, lakini pia Wayne Rooney anaonekana kupanda na kushuka.

Kinda anayepewa nafasi mara kwa mara James Wilson yeye bado anatakiwa kuendelea kujifunza mambo mengi sana kwa sasa na wakati mwingine akikosa kabisa uzoefu.

Kwa usajili wa mchezaji ambaye alikaa nje kwa miezi sita kutokana na majeraha ili aje akakusaidie ni lazima ukubali mambo mawili, kufanikiwa au kufeli, mpaka sasa United wamefeli, labda baadaye sana.