BOSI WA BODI YA LIGI AAMUA KUACHIA NGAZI

Mkurugenzi wa Bodi ya Ligi, Silas Mwakibinga ameamua kuacha kazi katika taasisi hiyo muhimu katika mchezo wa soka nchini.

Taarifa zinaeleza Mwakibinga amejiweka pembeni ni kutokana na mvutano huo uliopo baina ya pande mbili, kati ya TFF na klabu zinazopinga makato hayo.

Mvutano huo ulizuka hivi karibuni baada ya Rais wa TFF, Jamal Malinzi kutoa agizo la timu zote kukatwa asilimia tano za wadhamini, jambo ambalo lilikataliwa na klabu na kuamua kumteua mwanasheria, Damas Ndumbaro kusimamia haki yao.

Mwakibinga amesema kwa kifupi kuwa, ameamua kuachia ngazi tangu juzi Oktoba 31, bila kuweka bayana sababu za kuachia ngazi.

“Nipo kwenye kelele lakini napenda kukwambia kwa kifupi kuwa nimeacha kazi ya kuiongoza Bodi ya Ligi,” alisema Mwakibinga.

Alipoulizwa Katibu Mkuu wa TFF, Selestine Mwesigwa, alithibitisha juu ya kuacha kazi kwa Mwakibinga, licha ya kusema kuwa bado hawajapokea barua rasmi kutoka kwake.

“Nimesikia juu ya kuacha kazi kwa Mwakibinga, japo hatufahamu chanzo lakini pia bado hatujapata barua rasmi ya kuacha kazi kutoka kwake,” alisema Mwesigwa.

Habari za ndani kutoka bodi hiyo, zimedai kuwa tayari Mwakibinga amejiuzulu nafasi hiyo kutokana na kelele zinazoendelea kati ya TFF na klabu.