HATIMAYE ERASTO NYONI AREJEA MAZOEZINI, AANZA KAZI AZAM FC

Tukio la kumgonga dereva wa bodaboda lililomhusisha beki wa Azam FC na Taifa Stars, Erasto Nyoni hatimaye limemalizika salama.

Nyoni alitajwa kuhusika katika tukio hilo lililotokea maeneo ya Manzese, Tip Top jijini Dar es Salaam na kuamua kukimbia kisha kukamatwa akiwa maeneo ya Kijitonyama ambapo inadaiwa madereva bodaboda walimshambulia kwa kumpiga.

Meneja wa Azam FC, Jemedari Said ameliambia gazeti hili kuwa suala hilo limemalizika baada ya kushughulikiwa na viongozi wa Azam FC.

Jemedari alisema hakuna dereva bodaboda aliyejitokeza kudai kugongwa na Nyoni, hivyo wamelazimika kulipia gharama mbalimbali zilizojitokeza ikiwemo matengenezo ya gari aina ya Toyota Noah linalomikiwa na Kampuni ya Global Publishers Ltd ambalo Nyoni aliligonga wakati akiwa kasi.

“Kesho (leo) asubuhi anatarajiwa kuanza mazoezi ya pamoja na wenzake baada ya tukio hilo kumalizika kwa ajili ya kuitumikia timu yake,” alisema Jemedari.

Kwa upande wa Nyoni alisema: “Kikubwa ninashukuru suala hilo limemalizika salama, kesho natarajia kuanza mazoezi na wenzangu kwa ajili ya mechi ijayo.

“Ujue katika maisha misukosuko lazima itokee na huwezi kujua leo Mungu anapanga nini, tukio hilo limetokea na limekwisha salama nashukuru katika hilo.”