LIGI SASA HAITABIRIKI, ILA INACHANGANYA, NI UBORA AU UBOVU WA VIWANJA

Na Saleh Ally

KWA matokeo ya mechi za Jumamosi, maana yake Ligi Kuu Bara sasa haitabiriki na huenda inakwenda kwenye viwango sahihi vinavyoweza kuitwa ni vya ushindani.

Mechi nne tu za Jumamosi zinaweza kuwa uthibitisho kwamba ligi hiyo sasa ni ngumu kweli na haitabiriki.

Muonekano ulikuwa ni timu fulani ina nafasi ya kushinda kutokana na kuwa imara au kwa kuwa ile nyingine inaonekana kibonde kwa kupoteza mechi moja au zaidi kabla.

Timu moja ilikuwa na sare nyingi, nyingine ina ushindi mfululizo, lakini mechi zote nne zikawa na matokeo ambayo hayakutarajiwa.

Kuwa na mechi ambazo si rahisi kubashiri au kutabiri mshindi ni sehemu ya kuonyesha ugumu wake.

Kwa matokeo hayo ya juzi, sasa inaonyesha haina mwenyewe na yeyote anaweza kufungwa wakati wowote na timu yoyote.

Mtibwa Sugar 1-1 Simba:

Simba ilikuwa inapambana kupata ushindi wa kwanza na kuepuka sare, Mtibwa Sugar ambayo pia haijafungwa lakini iko moto maana yake katika mechi tano ilikuwa imeshinda nne, sare moja na iko kileleni ikiwa na pointi 13.

Simba ikaanza kufunga lakini Mtibwa ikasawazisha kwa bao la Mussa Hassan Mgosi baada ya kipa kinda Peter Manyika kuukosa mpira wakati akijaribu kuudaka.

Ugumu hapa utauona, ni timu yenye sare tano ambayo ilionekana wazi haina kitu lakini iliyokuwa ikipewa nafasi ndiyo imelazimika kusawazisha na sare yakawa matokeo bora lakini yasiyotegemewa kila upande.

Kagera 1-0 Yanga:

Ilikuwa mechi nzuri, ushindani wa juu, lakini Yanga ilikwenda Bukoba ikijua Kagera ni wagumu wakiwa kwao Kaitaba. Hata hivyo, baada ya ushindi wa mabao 3-0 dhidi ya Stand mjini Shinyanga, Yanga ilionekana iko tayari kwa lolote.

Kagera haikuwa inaaminika sana, ilishayumba, nani tena anaiamini? Lakini kwenye uwanja wake wenye kiwango kibaya wa Kaitaba ikaichapa Yanga kwa bao bora la Paul Ngwai ikaizamisha Yanga iliyoaminika imeanza kazi!

Ndanda FC 1-0 Azam FC:

Mabingwa watetezi Azam FC walikuwa wametoka kupoteza mechi dhidi ya JKT Ruvu wakiwa nyumbani Azam Complex. Safari yao kwenda Nangwanda Sijaona mjini Mtwara ilionekana hawana kazi ngumu.

Sababu mbili tu, kwanza walikuwa wanakutana na Ndanda ambayo imefungwa ugenini, imefungwa mara mbili nyumbani, hivyo imepoteza mwelekeo. Kwa mabingwa hao watetezi wenye kikosi imara, wasingekubali kupoteza tena mfululizo.

Wapi bana! Azam FC wakalowa bao moja bila majibu. Hakuna aliyetarajia kuanzia ndani ya kikosi hicho cha Chamazi na wadau wengine wote kwamba Ndanda itaamka siku inapokutana na Azam FC!

JKT Ruvu 1-2 Polisi:

JKT Ruvu waligoma kufungwa Mbeya kwa kuichapa Prisons, usisahau kabla waliikamata Mbeya City kwa sare ya bila mabao. Walipotua Chamazi wakaitungua Azam FC na safari hii wakawa wanakutana na Polisi Morogoro.

Wakati wameanza kufunga bao, wengi waliamini mvua ya mabao ilikuwa inafuatia kwa Polisi Morogoro. Wapi, mshambuliaji mkongwe, Danny Mrwanda akafunga mabao mawili na kuizima timu hiyo ya jeshi chini ya beki wa zamani wa Yanga, Fred Felix Minziro.

Kwa mechi hizo, tayari zinaonyesha hakuna urahisi tena na ndiyo wakati wa soka ya Tanzania kupanda kimaendeleo kama katikati suala la rushwa au uchezeshaji mbovu wa marefa havitaingia.

Pamoja na ugumu kuanza kuonekana, pia kuna kitu cha kujifunza kwamba viwanja vya mikoani ni tatizo kwa maana ya kiwango.

Ukiwa ulibahatika kuangalia kwenye Azam TV, itakuwa nafasi nzuri ya kung’amua asilimia 90 ya viwanja vya mikoani ni tatizo kubwa kwa soka ya nchi yetu.

Uwanja pekee wa mkoani ambao unaonekana na kiwango bora kuchezewa soka ni Kambarage mjini Shinyanga. Vilivyobaki, yaani Sokoine Mbeya, Kaitaba, Bukoba, Jamhuri, Morogoro na Mabatini, Mlandini ni tatizo.

Hivyo inawezekana ugumu wa mechi za mikoani kwa timu za Dar es Salaam ukawa si viwango na badala yake ubovu wa viwanja.

Hivyo ni tathmini inayoweza kugeuzwa juu na chini kuwa ligi ni ngumu sababu ya uwezo wa timu za mikoani kubadilika kwa kiwango lakini bado inaweza kubaki kuwa hivi; viwanja navyo vinaongeza ugumu wa ligi hiyo.