MALINZI, TAFADHARI USIKWEPE, JIBU HOJA ZA MSINGI ZA DK DAMAS NDUMBARO

MALINZI

Na Saleh Ally

MARA nyingi ukitoa hoja za msingi na mtu anayetakiwa kukujibu akawa ameishiwa, basi hufanya mambo mawili. Kwanza ni kulazimisha watu wakupuuze au kuanza kukuporomoshea matusi na kashfa.

Ukikutana na watu wa namna hiyo hupaswi kuwaogopa, hupaswi kuwahofia kabisa. Badala yake shikilia msimamo na mwisho ukweli huwa haushindwi hata kama kutakuwa na juhudi ya kuuchelewesha kufanya kazi yake.

Mdau mmoja wa soka alihoji, kwa nini Dk Damas Ndumbaro ndiye autangaze ubadhilifu wa Shirikisho la Soka Tanzania (TFF) huku akisema rais wake, Jamal Malinzi amechota mamilioni ya fedha kutoka TBL nje ya mkataba wao.

 

DK NDUMBARO

Nikamkubusha kauli ya Dk Ndumbaro kuwa, anamtuhumu Malinzi kwamba ametumia vibaya fedha za mkataba kati ya TFF na TBL, ndiyo maana anataka kupewa fedha za klabu, kama unakumbuka aliagiza asilimia tano za udhamini wa klabu 14 kutoka Vodacom na Azam TV zikatwe na kwenda kwenye maendeleo ya soka.

Hii ni ajabu, inashangaza kuona watu wanakaa kimya na linaonekana ni jambo dogo kabisa! Kama kweli TFF imetumia fedha vibaya, tena mamilioni ya fedha ambayo yamepotea kutoka kwenye mkataba wa TFF-TBL, vipi leo wanataka kuzinyonya klabu?

Nilianza kusimamia hili, wako wapambe wachache ambao naamini watakuwa wanafaidika na ubadhirifu huo wa fedha ndani ya TFF, wamekuwa wakiandika meseji za matusi kwangu na kashfa nyingi. Miaka 15 sasa naelea kwenye mfumo huo wa watu waoga wasiotaka kujibu hoja, wanaangukia kwenye vitisho.

Iko haja ya kujibu hoja za Dk Ndumbaro ambaye amezieleza, si kama ambavyo TFF ilizijibu kirahisi ikitaka mwanasheria huyo apuuzwe. Sasa ripoti iko mikononi mwa Championi na majina ya wahusika na matumizi mabovu ya fedha yalivyokuwa, yako wazi.

Ripoti hiyo ya ukaguzi iliyofanywa na kampuni mahiri ya kazi hiyo ambayo ililipwa na TBL inaonyesa madudu makubwa ambayo yanapaswa kuwekwa hadharani na ikiwezekana Watanzania wengi waipate na kuona fedha za soka zinavyochezewa na wajanja wachache, wapambe wao huku wakitaka kujionyesha ni wasafi kwa jamii, kumbe sivyo.

Ukiachana na fedha dola 10,000 (Sh milioni 17) alizochukua Malinzi, Desemba 24, 2013 ambazo kampuni hiyo ya ukaguzi imeonyesha hazina maelezo, Malinzi alichukua fedha nyingine tena dola 15,934 (Sh milioni 27).

Kama hiyo haitoshi, Malinzi akalipwa tena dola 69,471 (Sh milioni 118) na dola 63,735 (Sh milioni 108) ndani ya mwezi mmoja tu, maana yake amechota zaidi ya Sh milioni 270 kwa mujibu wa ripoti hiyo ya ukaguzi iliyotolewa na Dk Ndumbaro.

Ripoti inaonyesha Malinzi aliikopesha TFF, lakini haionyeshi lini, wapi aliikopesha au fedha alizokopesha ziliingia kwenye akaunti moja ya TFF au zilitumika vipi. Ndiyo maana kampuni hiyo ya ukaguzi, ikaziita unsupported document (nyaraka zisizo na vielelezo).

Achana na hivyo, ndani ya ripoti hiyo kuna madudu lukuki, mfano ni manunuzi ya magari aina ya Toyota Hiace na ukaguzi unaonyesha hazipo na hata wakaguzi wa mahesabu hawakuweza kuziona.

Hiace zote mbili zimenunuliwa kwa dola 34,177 (Sh milioni 58), ajabu moja ikalipiwa ushuru wa dola 20,000 (Sh milioni 34), kitu ambacho kamwe hakiwezi kutokea. Lakini ajabu moja ya gari hizo zinatumia jina la Juma Sharrif hadi leo, hii ni baada ya wakaguzi kuishia kuonyeshwa kadi za usajili tu wa magari, lakini zenyewe hawakuziona ng’o.

Ukaguzi huo wa mahesabu ya TFF kwenye mkataba wa TBL yaliyoisha Mei 8, 2014 yameanika madudu mengi tu yakiwemo yale ya malipo ya mamilioni ya Kocha Kim Poulsen wakati anavunja mkataba na inaonyesha ni aghalabu kulipwa dola 90,000 (Sh milioni 153) eti kisa kavunja mkataba!

Au kumfukuza kwake ilikuwa ni sehemu ya kujitafutia maslahi? Je, TFF inaweza kuuweka mkataba wake hadharani na kusema kweli ililipa kiasi hicho? Ndiyo, ifanye hivyo.

TFF wasipaniki, huu ndiyo wakati mzuri wa kujibu hoja ya jambo hili. Sasa kwa wadau wa soka tunaweza tusijali sana aliyeanzisha au kuyavumbua madudu hayo ni Dk Ndumbaro, badala yake majibu sahihi kuhusiana na kinachoendelea.

TFF sasa haipaswi kuhama kwenye hoja na kuanza kudai inachafuliwa au fulani hampendi fulani, badala yake iingie kwenye data na kueleza wazi kwamba fedha hizo utaratibu wake ukoje na ilikuwa vipi.

Nawakumbusha TFF, najua kuwa watafanya kila wanaloweza kupambana na kila anayewakosea. Najua haitawasaidia, najua mwisho watakwama kwa kuwa watapita njia ambazo si sahihi. Lakini mwisho ukweli utapaa na kuwashinda nguvu.

Hivyo kama wana jibu sahihi kupitia hoja hizo, basi waweke mambo wazi ili wadau wa soka, Watanzania ambao ndiyo wamiliki wa TFF wajue. Kumbukeni wote mnaochukia TFF kukosolewa, shirikisho hilo si la Malinzi au rafiki zake, ni la Watanzania. Walio hapo, wengi wamechaguliwa na walioajiriwa, pia wanafanya kazi kwa dhamana ya Watanzania.

Hivyo, Watanzania wana haki ya kujua na niwaahidi, uchunguzi kuhusiana na suala hili, kuendelea kuchimbua na kujua litaendelea. Hivyo majibu au ufafanuzi kutoka TFF, litakuwa jambo zuri kwa faida ya soka yetu ambayo tunapigania ikue, wengine wanataka iendeshe maisha yao na kuwanenepesha.

Kamwe nguvu ya hisia haijawahi kuishinda hoja kwa kuwa haitoki inabaki kichwani na mwisho inaitwa mawazo lakini anayezungumza mawazo yake akichanganya uhusiano wa ubongo wake na mdomo vikishirikiana na macho, anaweza kujenga jambo sahihi linaloeleweka.

Basi TFF, watu wetu, rafiki zetu, kaka na ndugu zetu, hebu mjibuni Dk Ndumbaro tung’amue ukweli kwa faida ya sisi Watanzania walalahoi tunaoupenda mpira.