MKE WA WAZIRI MKUU AONA MBALI, ASEMA MIGOGORO TFF ITAKIMBIZA WADHAMINI

Mama Tunu Pinda amesema kuna kila sababu kwa Shirikisho la Soka Tanzania (TFF) kutatua migogoro lukuki na malumbano yasiyoisha dhidi ya wadau mbalimbali wa soka nchini.

Mke huyo wa Waziri Mkuu, Mizengo Pinda amesema kama TFF haitaliona hilo, basi itakimbiza wadhamini.

“TFF inapaswa kuisaidia serikali kuleta ustawi wa maendeleo ya michezo nchini. Migogoro haiwezi kuisaidia lolote.

“Kibaya zaidi wanalumbana kuhusiana na fedha za wadhamini, nani atakuwa tayari kuzipeleka fedha zake zigombaniwe na kuliwa na wajanja wachache,” alisema Mama Pinda.

Mama Pinda amekuwa si mzungumzaji sana katika masuala ya michezo lakini safari hii amejitokeza na kuwaasa TFF.

Shirikisho hilo chini ya Jamal Malinzi limekuwa likiingia kwenye migogoro na wadau wengi wa soka kila kukicha.

Tokea utawala wa Malinzi uingie madarakani, umekuwa ukifanya timuatimua ya maofisa kadhaa wa shirikisho hilo.

Pia limekuwa likilumbana na wadau mbalimbali hadharani au chinichini.

SOURCE: NIPASHE