MKUDE NA SHILINGI ZAKE MILIONI 60, SOMO JIPYA KWA WOTE

Na Saleh Ally

SIMBA imembakiza kiungo wake Jonas Mkude ambaye imelazimika kumpa kitita cha Sh milioni 60 ili asaini mkataba mpya wa miaka miwili baada ya ule wa kwanza kuwa umemalizika.

Mkude ni kati ya viungo hodari wanaochipukia kwa kasi, hakuna ubishi licha ya kuwa ni faida kubwa kwa Simba lakini ni faida kubwa kwa taifa letu kama ataendelea kuhifadhi kiwango chake na kukiendeleza.

Usajili wa zaidi ya Sh milioni 50, mara nyingi umekuwa ukifanyika kwa wachezaji wa kigeni, tena kutokea nchi za jirani kama Kenya, Uganda au Rwanda.

Wachezaji wa nyumbani wengi wao wanaonekana hawana kiwango cha fedha hizo, lakini hata wa kigeni wanakuwa wanatokea katika ligi ambazo hazina tofauti au ziko chini ukilinganisha ubora na ule wa Tanzania Bara!

Fedha ambazo Simba wamelipa kwa Mkude, zinaweza kuwa somo kubwa kwa wale wanaotaka kujifunza au kuona mbali kwa kuwa ni mwanzo wa mapinduzi wa kuwaamini wachezaji waliotunzwa, kusimamiwa na kuendelezwa kwenye klabu za nyumbani.

Kumlipa fedha kama hizo Haruna Niyonzima (Rwanda), Paul Kiongera (Kenya), Joseph Owingo (Uganda) ilikuwa inaonekana ni kawaida.

Lakini si kijana kama Mkude na hiyo ilikuwa imani potofu kwa kuwa mazingira ya kuwakuza vijana wetu yamekuwa mabovu na hawapewi dira kuwa kujituma, kujitunza na mazingira mazuri ya malezi yanaweza kuwapa faida kubwa baadaye.

Kwa Sh milioni 60 alizopata Mkude ni hamasa kubwa katika maisha yake ndani na nje ya soka. Kama atafungua biashara na atataka iendelee basi lazima atajituma kazini na hapo ndipo atakapofanikiwa. Naamini hawezi kuwa ‘kilaza’ akabweteka na kupotea kwa kuwa amejitahidi kupanda daraja hadi kufikia alipo.

Tuwapongeze Simba, wamemlea kama alivyosema Mkude mwenyewe, lakini mwisho wamempa thamani na yeye anaingia kwenye changamoto ya deni la kupambana kwa ajili ya klabu na yeye pia.

Faida kwa taifa:

Simba wapewe pongezi tena kwa kuendelea kutengeneza watu ambao ni faida kwa taifa letu kwa kuwa kila anavyoimarika, Mkude atakuwa tegemeo la taifa na akifanya vizuri zaidi na kusonga mbele kimataifa, ataingiza fedha nyingi zaidi na kuwa mfano kwa vijana wengine wanaohitaji hamasa ya kuamini mambo yanawezekana, nao wakajituma.

Wapo vijana ambao hawaamini kuwa Mtanzania anaweza kufanya vizuri nje, kwa mwendo wa Mkude akiendelea kujituma na kuwa na malengo, ana kila sababu ya kufanikiwa na kucheza nje ya Tanzania, hata Ulaya. Hiyo itakuwa ni changamoto kwa vijana na njia sahihi ya kuamini kuwa inawezekana.

Fedha nyumbani:

Unaweza kusema ubaguzi lakini hakika ni furaha kumuona Mtanzania mwenzako anachukua mamilioni kutoka kwenye taasisi ya nyumbani na hasa kutokana na ubora wa kazi yake.

Bora apewe Mkude kuliko angepewa mwingine yeyote wa taifa la jirani. Tunapigania vijana wenzetu, wadogo zetu wapate ajira. Mtanzania anastahili kupata fedha za Tanzania, ndiyo maana unaweza kusema fedha alizopewa kiungo huyo, zimebaki nyumbani.

Kwa malipo ya Sh milioni 60 kwa Mkude, tayari ni changamoto kwa vijana wengi wanaocheza kwenye timu za vijana kama wakijituma na kukubali kuumia sasa, basi mafanikio hayapo mbali nao.

Hisia za kusonga:

Vijana hao wana kila sababu sasa ya kuamini kwamba wana uwezo wa kusonga lakini haiwezi kuwa rahisi. Hata Mkude alipofikia hapo haiwezekani alikuwa akilala na kuzembea mazoezi halafu akapata alichopata kutoka Simba.

Angalia kiungo Pierre Kwizera, leo hata kuna watu wameanza kuamini Mrundi huyo hana lolote, lakini ukweli kijana huyo ni kati ya viungo bora kabisa katika Ukanda wa Afrika Mashariki na Kati, siku itafika hilo litadhihirika.

Kutokana na umahiri wa Mkude, watu wameanza kuamini hafai. Vizuri kujifunza kwamba Mtanzania anaweza kuwa changamoto kwa mgeni na ikiwezekana aanze yeye na mgeni afuatie.

Kuwahofia Wakenya, Waganda, Wanyarwanda si sahihi. Tujiulize wanatokea kwenye ligi za namna gani, huko kwao wana nini kipya hasa? Wanachoweza na tusichoweza wakati hatuna tofauti ni nini?

Deni alilonalo Mkude kwa Simba ni kuonyesha walichofanya kwake ni sahihi, awaonyeshe Watanzania thamani aliyopewa Msimbazi hawakukosea lakini atoe somo kwa wadogo zaidi yake kuwa hata wao wanaweza kwa kuwa yeye amefanya hivyo. Akiboronga, basi atavunja kila kitu kuwa kumbe Watanzania hawastahili kulipwa fedha nyingi na watoto hawana sababu ya kujituma, maana hata wafanyeje, watafeli tu!