TAMBWE ANOGA YANGA, AOMBA APANGWE NA MLIBERIA WATU WAONE KAZI

Straika mpya wa Yanga Mrundi, Amissi Tambwe, amemuangalia straika Mliberia, Akpah Sherman na kutamka kuwa atafurahi kama akianzishwa naye kwenye kikosi cha Yanga.

Mastraika hao wote, walijiunga na timu hiyo hivi karibuni kwenye dirisha dogo la usajili, Tambwe yeye amesaini mkataba wa mwaka mmoja na Mliberia miaka miwili kwa ajili ya kuichezea Yanga inayojiandaa na Kombe la Shirikisho Afrika na Ligi Kuu ya Tanzania Bara.

Washambuliaji hao, tayari wameshaanza kufanya mazoezi pamoja ya kujiandaa na Ligi Kuu Bara inayotarajiwa kuendelea kutimua vumbi Desemba 26, mwaka huu.

Tambwe alisema alimuona mshambuliaji huyo kwa mara kwanza kwenye mchezo wa Nani Mtani Jembe 2, yeye akiwa anaichezea Simba ambayo ilimalizika kwa Yanga kufungwa mabao 2-0 na kuukubali uwezo wake.

Tambwe alisema, mshambuliaji huyo ana uwezo mkubwa wa kufunga mabao na msumbufu kwa mabeki wa timu pinzani, hivyo anaamini akicheza naye pamoja atafunga mabao mengi.

“Sherman ni mchezaji mzuri mwenye uwezo mkubwa wa kucheza soka, tena katika nafasi anayocheza ya ushambuliaji, ni mshambuliaji anayetishia mabeki wa timu pinzani.

“Natamani kucheza naye katika kikosi cha kwanza, ninaamini nikipangwa naye pamoja, basi nitafunga mabao mengi sana.

“Kwa sababu licha ya uwezo wake wa kufunga mabao, lakini ana uwezo mkubwa wa kutengeneza nafasi za kufunga ni mchezaji ninayetamani kucheza naye pamoja, lakini ninaomba muda zaidi wa kuzoeana naye katika kipindi hiki ambacho tupo kwenye maandalizi,” alisema Tambwe.