AZAM FC KUREJEA NCHINI LEO TAYARI KWA LIGI KUU BARA

Kikosi cha mabingwa watetezi wa Ligi Kuu Tanzania Bara, Azam FC, kinatarajiwa kutua leo nchini kutokea Lubumbashi, DR Congo kikiwa na matumaini makubwa ya kuanza vyema michuano ya kimataifa baada kuyafanyia kazi mambo kadhaa.

Azam iliondoka nchini mapema, Januari 27, mwaka huu kwa ajili ya kuweka kambi na kushiriki michuano maalum baada ya kupata mualiko kutoka kwa Klabu ya TP Mazembe.

Timu hiyo ikiwa nchini humo, iliendelea na mazoezi yake na kucheza michezo na timu tofauti ikiwemo TP Mazembe, Don Bosco na Zesco ya nchini Zambia, kwa ajili ya maandalizi ya Ligi ya Mabingwa Afrika. Itacheza na El Merreikh ya Sudan Februari 15.

      

Meneja wa timu hiyo, Jemedari Saidi, alisema timu hiyo ina matumaini makubwa ya kuanza vyema michuano yake kutokana na maandalizi waliyofanya.

“Timu inatarajiwa kutua kesho Jumatano baada ya kumaliza michuano yake ambayo ilialikwa nchini Kongo na mwalimu Joseph Omog ameitumia vyema kuhakikisha anakuwa na kikosi bora zaidi kwa ajili ya michuano ya kimataifa,” alisema Jemedari.