SIKIA HII KALI YA ZACHARIA HANS POPPE KUHUSIANA NA AMISSI TAMBWE

Mwenyekiti wa Kamati ya Usajili ya Simba, Zacharia Hans Poppe, amesema anaamini alipaswa kupewa shukurani kutokana na kuwa wa kwanza kusisitiza klabu yake inapaswa kumuacha straika Amissi Tambwe.

Tambwe alijiunga na Yanga, siku moja tu baada ya kuachwa na Simba na amekuwa akionyesha mwelekeo mzuri.

Katika mahojiano maalum Hans Poppe, alisema Tambwe amekuwa na bahati na Yanga na mambo yanakwenda vizuri kwa kuwa aliachwa na Simba.

“Angebaki Simba, huenda bado angekuwa hafanyi vizuri. Lakini sioni kama kuna sababu ya kuendelea kulaumu kuhusiana na sisi kumuacha, badala yake watushukuru, tumemuacha na kaenda Yanga, sasa mambo mazuri,” alisema Hans Poppe.

“Nafikiri leo ni wakati mwafaka wa kuweka hili wazi, kwamba mimi ndiye niliyesisitiza Tambwe aondolewe. Kweli Phiri hakutamka tumuondoe, lakini alisema vitu vinavyomaanisha kwamba hamhitaji.

“Mazungumzo ya Phiri yalionyesha wazi hakuwa anamhitaji Tambwe. Phiri aliniambia kwa mfumo wake mchezaji wa box (anayesubiri kufunga) hawezi kufanya vizuri.

“Sasa kulikuwa na haja gani ya kuendelea kubaki naye akiwa hachezi? Leo yupo Yanga anacheza,” alisisitiza Hans Poppe.

Tambwe alikuwa mfungaji bora msimu uliopita kwa kufunga mabao 19 akiwa na Simba ambayo alijiunga nayo akitokea Vital’O ya Burundi.