YULE MKALI WALIYEMTAKA SIMBA, YEYE AKUBALI KUTUA ZAKE AZAM FC

Yule mshambuliaji aliyekuwa anatakiwa kwa udi na uvumba na Simba, imeelezwa ameishakubaliana na Azam FC ambao walikuwa wakimuwania kwa juhudi zote.

Straika huyo, Mohammed Traore wa El Merreikh ya Sudan amekuwa akifanya mazungumzo na Azam FC kwa kipindi kirefu. Lakini Simba nayo ilikuwa ikijipenyeza kuonyesha inamhitaji.

Simba sasa inataka kusajili straika mwenye uwezo mkubwa wa kuzifumania nyavu na Traore raia wa Mali ndiye aliyeonekana anafaa lakini Azam imewawahi kwa kumsajili ili kujiweka vizuri.

Taarifa zinasema straika huyo mwenye umri wa miaka 26, tayari amekubali kutua Azam FC baada ya wenyewe kuonyesha wako ‘siriaz’.

Aliwahi kuzichezea klabu kubwa kama Ismaily ya Misri na baadaye Al-Hilal ya Sudan kabla ya kutua El Mereikh msimu wa 2013/2014.

Simba ilifanya mazungumzo na Traore, kwa mara ya kwanza alipokuja nchini kucheza dhidi ya Azam katika Ligi ya Mabingwa Afrika kwenye Uwanja wa Azam Complex. Mkataba wa Traore na El Merreikh unaisha mwezi ujao.

Mmoja wa mabosi wa Simba katika kamati ya usajili alisema; “Tulikuwa tumeshamaliza kila kitu na Traore na tulitegemea tungekuwa naye msimu ujao ili kuimarisha kikosi chetu.”

Rafiki wa karibu wa Traore kutoka Sudan, amelithibitishia Traore kusaini Azam kwa kusema; “Traore amesaini Azam na hana mpango wa kubaki El Merreikh.”