SIMBA WATAJA NAFASI WANAZOTAKA KUBORESHA KATIKA KIKOSI CHAO

Huku Ligi Kuu Bara inaelekea ukingoni, Kamati ya Usajili ya Simba, tayari imeanza kufanya tathmini ya wachezaji inaowahitaji kuongeza nguvu kwa ajili ya msimu ujao.

Mwenyekiti wa Kamati ya Usajili ya Simba, Zacharia Hans Poppe, amesema tayari wameshafanya tathmini kuwa wanahitaji kuongeza wachezaji katika nafasi tatu ili kujiimarisha zaidi.

“Siwezi kukuambia majina, lakini tutaongeza wachezaji katika nafasi tatu kwa ajili ya kujiimarisha zaidi.

“Kwanza ni beki wa kati, tunalazimika kujiimarisha zaidi kutokana na tulivyoona utendaji katika nafasi hiyo.

“Hatujajua beki atatokea nje au ndani ya Tanzania, tayari tumeanza kutafuta taratibu. Pili tunahitaji kiungo ambaye atakuwa na uwezo wa kukaba na kuchezesha timu ili kusaidiana na kina (Said) Ndemla na (Abdi) Banda pale kati.

“Nafasi ya tatu ni mshambuliaji, ukiangalia inaonyesha wazi tunahitaji mtu mzuri wa kufunga,” alisema Hans Poppe.

Alisisitiza katika mechi chache zilizobaki, watakaa na Kocha Goran Kopunovic na kusikia ana maoni au mapendekezo yapi.

Hadi sasa Simba iko katika nafasi ya tatu katika msimamo wa Ligi Kuu Bara na leo Jumamosi inakutana na Kagera Sugar kwenye Uwanja wa Kambarage mjini Shinyanga.