AIBU HII SASA INATOSHA, NOOIJ NENDA KWENU

Kama kweli Kocha Mart Nooij ataendelea kubaki na kuifundisha Tanzania, itakuwa sehemu ya mijiza ya soka.

Taifa Stars imepoteza mchezo wake wa pili kwa kufungwa mabao 2-0 dhidi ya Madagascar. Kipigo cha kwanza kilikuwa ni bao 1-0 dhidi ya Swaziland.

Mechi mbili, Taifa Stars haina pointi wala bao. Tena kama utazungumzia msimamo wa ubora wa Fifa, Stars iko juu ya timu zote.

Inawezekana kabisa Cosafa walijua Stars ina ubora wa juu kutokana na rekodi zake.

Walitoa mwaliko wakitemea ushindani na soka lenye mvuto. Lakini Stars imeonyesha kabisa haichezi kitimu.

Kocha huyo Mholanzi mbishi, mwenye sura ya kiburi na majibu ya nyodo, ndiye chanzo.

Stars imeshindwa kuonyesha soka la kuvutia. Stars imeshindwa kuonyesha ni timu yenye kocha anayelipwa mamilioni ya Watanzania.

Uwezo aliouonyesha Nooij hauna tofauti hata kidogo na makocha wetu wa wazawa, tena huenda wako wanaomzidi.

Nafikiri huu ndiyo wakati mwafaka wa babu huyo wa Kiholanzi kuiacha Stars akatafute sehemu nyingine anakoweza kuwafanyia utani na kazi.