BIN KLEB ASEMA YANGA ITAENDELEA KUTESA, ASISITIZA SIMBA BADO KABISA, AELEZA TATIZO LAO

BIN KLEB (KULIA) AKIWA NA TENGA (KATIKATI) NA BIN SLUM.

Na Saleh Ally

WAKATI Yanga inaanza kujivunia kuwa na moja ya vikosi bora chini ya uongozi wa Yusuf Mehbuub Manji, kuna watu hawawezi kusahaulika.

Wanaweza kuwa wengi lakini mmojawao ni Abdallah Bin Kleb ambaye aliwahi kuwa Mwenyekiti wa Kamati ya Usajili ya Yanga.

Kati ya wachezaji aliopambana kuwasajili ni pamoja na Haruna Niyonzima, Kelvin Yondani, Mbuyu Twite, Juma Kaseja, Ally Mustapha ‘Barthez’, Deogratius Munishi ‘Dida’, Emmanuel Okwi na wengine wengi.

Bin Kleb akishirikiana na Seif Ahmed ‘Magari’ pamoja na wajumbe wengine, waliongoza mapinduzi kwa mara ya kwanza Yanga kuwa na timu kali ya usajili, yenye kuweza fitna.

Awali, suala la fitna za soka, wachezaji wazuri wengi walichukuliwa na Simba na hasa kama ukizungumzia lile Kundi la Friends of Simba (Fos) ambalo lilikuwa likimtaka mchezaji au kocha, hachukui muda wala hawezi kukwepa.

Kipindi cha kamati ya usajili ya Bin Kleb, mambo yakawa tofauti na sasa ikaonekana hata Fos nao waliingia hofu, kwani mara kadhaa walijikuta wakiangushwa kwenye usajili wa wachezaji waliowataka na Yanga ikafanikiwa kuwanasa.

Chini ya uongozi wa Manji na kikosi cha Bin Kleb, Yanga ilianza kujijenga zaidi na kuifanya kuwa imara hadi sasa ni tishio. 

Ilionekana kazi iliyowashinda ni moja tu, kuwafunga Simba.

Wakati Wanayanga wakionekana kuwa na furaha, ghafla Bin Kleb na Seif ‘Magari’ wakapotea na taarifa zikawa zinaeleza kwamba wamebanwa na majukumu ya kifamilia pamoja na biashara zao.

Ilielezwa wawili hao, mpirani tu ni nadra kwenda na unakumbuka wakati fulani Bin Kleb aliwahi kumuomba Manji asimteue kwenye kamati yoyote kutokana na kubanwa kwake na majukumu.

Huenda Wanayanga wangependa kujua kiongozi wao huyo aliyekuwa mchapakazi yuko wapi na tatizo lake nini akaitupa kando klabu yake ambayo sasa inaonekana kwenda na mwendo mzuri.

SALEHJEMBE: Inaonekana kama umeikimbia Yanga. Je, kuna tatizo lolote?

Bin Kleb: Hapana, hakuna tatizo ni kutokana na kubanwa na majukumu tu ya kikazi pia familia.

SALEHJEMBE: Lakini yote hayo yalikuwepo wakati ule, vipi sasa?

Bin Kleb: Kweli, lakini siku zinapishana ndugu yangu. Wakati mwingine majukumu yanazidi zaidi. Hivyo nimeona ni wakati mzuri kuyatekeleza.

SALEHJEMBE: Iwapo Yanga watakuja na kuomba ushirikiano wa jambo fulani, uko tayari?

Bin Kleb: Siyo wakija, hata sasa nimekuwa nikishirikiana nao katika mambo kadhaa. Ni jambo la kawaida kabisa, inategemea na nafasi yangu. Maana sasa mara nyingi nakuwa nje ya nchi kikazi, lakini nikiwa hapa, tunashirikiana vizuri kabisa.

SALEHJEMBE: Labda mwenendo wa Yanga kwa kipindi hiki unakuridhisha?

Bin Kleb: Hakika Yanga inakwenda vizuri kabisa. Uongozi ni imara, kikosi ni kizuri na ina kocha bora.

SALEHJEMBE: Kwa sifa hizo, unaona inaweza kuendelea kufanya vizuri kwa msimu huu mpya au ndiyo zamu ya Simba?

Bin Kleb: Yanga ina nafasi kubwa ya kufanya vizuri. Utaona tangu timu tuliyoisajili, mabadiliko ni kidogo sana. Maana yake ina wachezaji waliozoeana na kocha ni bora, pia muunganiko wake na msaidizi wake (Charles Boniface Mkwasa) umekubali na unafanya kazi vizuri.

SALEHJEMBE: Hauoni kuwa huu unaweza kuwa ni msimu wa Simba ambao wanaonekana kujipanga zaidi?

Bin Kleb: Sidhani, Simba hawawezi kufanya vizuri labda baada ya miaka mingine mitatu. Mpinzani mkubwa wa Yanga ataendelea kuwa Azam.

SALEHJEMBE: Simba hawajashika hata nafasi ya pili kwa misimu mitatu sasa, unafikiri watakubali?

Bin Kleb: Hawana ujanja, utaona Yanga na Azam wana timu zilezile na zimeboreshwa tu na hilo ndiyo jambo zuri. Tofauti na Simba, makocha wapya, wachezaji wapya. Ingawa kweli mpira unaweza kubadilika lakini sidhani kama wataweza kuwapita Yanga na Azam na kuwa mabingwa.

SALEHJEMBE: Timu nzuri ndiyo, lakini uongozi ukiwa bora hauoni unaweza kusaidia kuleta mabadiliko na kuisaidia timu kufanya vizuri hata kama haikutegemewa?

Bin Kleb: Kweli, hilo linawezekana. Lakini uongozi wa Yanga ni imara pia. Tena Yanga wana bahati, hawana watu wengi lakini wanaweza kufanya kazi zao kwa ufasaha, maana wanasikilizana.

SALEHJEMBE: Unaamini Simba hawasikilizani au kuna tatizo?

Bin Kleb: Raha ya Simba wana watu wengi sana kwenye uongozi, unaweza kusema wanajua mpira, si kama Yanga. Lakini wana tatizo la kila mmoja kuwa anajua kuliko mwingine, hilo nalo linawaangusha pia.

SALEHJEMBE: Ukiachana na hilo, Yanga haionekani kama inatoa nafasi ya kukuza viongozi makinda ambao wataisaidia baadaye. Nini maoni yako katika hili?

Bin Kleb: Hilo naungana na wewe, Yanga haina watu wengi kwa kuwa hapo awali hakukuwa na utaratibu huo. Lakini sasa angalau utaona wapo vijana na baadaye watakuwa msaada kwa klabu baada ya miaka kadhaa.

SALEHJEMBE: Pamoja na yote mazuri au mwendo mzuri, unafikiri nini hasa tatizo la Yanga imeshindwa kuifunga Simba?

Bin Kleb: Unajua Yanga imekuwa na wachezaji walewale kwa kipindi kirefu. Baadhi wamo wale waliofungwa mabao 5-0 na Simba. Hivyo bado wameathirika kisaikolojia na hofu inawatafuna.

SALEHJEMBE: Nini sasa kifanyike?

Bin Kleb: Nafikiri Yanga waendelee kuimarisha ubora wao wa kazi. Iko siku wataipatia Simba, kuanzia hapo mambo yatabadilika.

SALEHJEMBE: Labda lini unatarajia kurejea tena na kuungana na Yanga kama zamani?

Bin Kleb: Niko na Yanga kila ninapopata nafasi. Ikiwa nitapata nafasi zaidi, basi nitaongeza muda zaidi wa kuwa na wenzangu, tushirikiane kusukuma gurudumu la Yanga.