CHEZEA TANESCO WEWE; YANGA WAISHI KWA MWANGA WA SIMU ZA MKONONI

Katakata hovyo ya umeme ambao upo chini ya Shirika la Umeme Tanzania (Tanesco) kwenye Uwanja wa Taifa jijini Dar, juzi Jumatano kulisababisha hali ya mvurugano mara baada ya mechi ya Yanga dhidi ya Tanzania Prisons.

Mvurugano huo ulitokea baada ya mechi hiyo ambapo kiza kilitawala katika vyumba vya kubadilishia nguo, hali iliyosababisha wachezaji wa Yanga na wale wa Prisons ambao walikuwa wametoka kucheza, kupata wakati mgumu katika kubadili nguo na kubeba vitu vyao kwenye vyumba hivyo.

Timu hizo zilikutana katika mchezo wa Ligi Kuu Bara ambapo wachezaji wa timu zote walilazimika kutumia mwanga wa simu zao kuonana.

SALEHJEMBE ilishuhudia hadi viongozi wa timu zote nao wakipata wakati mgumu kuonana na kufanya shughuli zao.

Alipoulizwa meneja wa uwanja huo, Rish Urio juu ya tatizo hilo alisema “Tatizo ni Tanesco, najaribu kulishughulikia, acha kwanza nimalizie kwa sababu yakitokea matatizo huko nje, Tanesco pia hawawezi kuzuia ila tunazo ‘phase’ mbili zinafanya kazi badala ya tatu ambazo kwa kawaida ndizo zinatumika, nadhani baada ya muda mfupi utarejea.”