FARID MUSSA, DOGO NI ZAWADI KWETU, LAKINI ANA HAYA YA KUFANYA….

Na Saleh Ally

KUMEKUWA na kawaida ya watu wengi sana hawataki kuona wachezaji wakisifiwa na vyombo vya habari, wanadai ikifanyika hivyo, basi wachezaji wanavimba vichwa na kuishia njiani.

Kila mtu ana akili zake, huwezi kumlazimisha zikapanda. Kazi yangu kuandika, mchezaji yake ni kucheza. Akishindwa kuifanya yake wakati nimefanya yangu, atafeli yeye, mimi nitaendelea.

Leo nimeamua kusifia sana, pia kuasa kwa kuwa kuna kitu nimekiona. Huenda kuna wengine wamekiona lakini walishindwa kusema au walipuuzia, lakini mimi nakianika.

Kiungo wa pembeni wa Azam FC, Farid Mussa, ambaye sasa yuko katika kikosi cha timu ya taifa, Taifa Stars, kwangu ni mchezaji ambaye naweza nikasema ni zawadi.

Tanzania ina vipaji vingi sana, iwe ni mchezo wa soka au mingine. Lakini kumekuwa hakuna njia sahihi ya kuvisaka, kuviendeleza vipaji.

Nchi yetu ina zawadi kubwa ya vipawa vya kila aina kutoka kwa Mwenyezi Mungu. Nataka nikuhakikishie, Farid ambaye sasa ana miaka 19, ni zawadi kutoka kwa Mwenyezi Mungu, kwake, kwa familia yake.

Nasema ni zawadi kwa Watanzania kwa kuwa tunahitaji wachezaji wa aina yake, wachezaji wenyewe uwezo mkubwa ambao unaonekana ni tofauti au una jipya ndani ya mchezo wa soka.

Tanzania inahitaji wachezaji wa kwenda nje ya mipaka ya nchi hii ili baadaye wawe msaada kwa taifa letu ambalo pamoja na kutaka timu imara ya taifa, lakini kuna mambo kadhaa ya kufanya kwanza ili kuingia ili kupata msaada huo.

Mfano, kuwa na wachezaji wengi wanaocheza nje ya Tanzania kama unavyoona Mbwana Samatta na Thomas Ulimwengu wanaocheza TP Mazembe ya DR Congo walivyo msaada mkubwa kwa sasa.

Utaona wameiwezesha kufika fainali ya Ligi ya Mabingwa Afrika. Hakika changamoto wanazokutana nazo, wanaporejea kuitumikia Taifa Stars wanakuwa ni msaada mkubwa sana.

Sisemi wachezaji wanaocheza hapa nyumbani hawana msaada, lakini lazima tuchanganye ili kuwe na changamoto ya nguvu ya kutoka ndani na nje.

Utaona hata hao Nigeria, Ghana, Ivory Coast wamekuwa na mafanikio makubwa kutokana na wachezaji wanaocheza nje ya nchi zao. Nchi kama Misri imekuwa ikijitutumua kwa kutumia wachezaji wa nyumbani, lakini sisi bado hatuna ligi imara yenye timu zenye utajiri unaojibeba ili kutuwezesha kutegemea timu za nyumbani kuwa na kikosi imara cha timu ya taifa.

Nikiwa Uturuki kwenye kambi ya Taifa Stars, nilipata bahati ya kusoma mambo mengi sana ya Farid ndani na nje ya uwanja. Niligundua ni mchezaji ambaye ana hamu ya mafanikio ambaye pia anajitambua sana.

Alinifurahisha kwa kuwa anaonyesha ana nidhamu na msikivu. Kidogo tu, alikuwa anaonyesha ‘utoto’. Jambo ambalo niliamini linaweza kuendana na umri wake. Mfano, wakati wenzake wamejipanga kwenye msitari katikati ya mazoezi, yeye aliendelea kucheza “Bolingo”.

Hilo linaweza kuwa dogo sana, lakini uwanjani, ana kasi, nguvu, akili ya haraka, krosi za nguvu, nguvu ya kupiga mashuti na kipimo changu cha kwanza ilikuwa ile mechi mazoezi kati ya Stars dhidi ya Libya. Farid alitoa pasi kwa Simon Msuva baada ya kuwachambua mabeki wawili, wakamuangusha na kuwa penalti aliyofunga John Bocco.

Uwezo wa Farid katika miaka 19 unaonyesha uko juu. Utaona hata Kocha Charles Boniface Mkwasa ameonyesha wazi kweli anamuamini.  Angalia kikosi cha Stars kilichoivaa Nigeria, alikuwa kati ya wachezaji wanne waliokuwa mbele kusukuma mashambulizi katikati na pembeni.

Wachezaji hao ni Samatta, Ulimwengu, Mrisho Ngassa na Farid. Watatu, wote wanacheza nje ya Tanzania, Farid pekee ndiye alikuwa anatokea ndani ya Tanzania. Hakika alicheza vizuri sana kwa muda wote.

Huyu bwan’mdogo hakika ni zawadi ambayo ni muhimu sana kwa soka la nchi yetu. Anachotakiwa ni kujitambua halafu ajiendeleze na si kujitambua halafu aanze maringo na kujisahau.

Lakini kwa upande wa wadau, tunatakiwa kumpa nafasi, kumkubali na ikiwezekana inapofikia wakati wa Taifa Stars ni kumsaidia. Angalia leo kwa umri wake, anapata nafasi Stars na wangapi unaowaamini wameikosa?

Angalia Azam FC, anapata nafasi ya wachezaji 11 wa kwanza, jiulize wangapi hawana. Wengine wachezaji wa kigeni wameachwa kwa kuwa kocha anaona anaweza.

Ninaamini kabisa, Farid anatakiwa kuondoka nchini kwenda nje, iwe Ulaya au timu kubwa sehemu nyingine Afrika ili akajiendeleze. Anaweza kuja kuwa mshambuliaji tishio Afrika na hilo linawezekana, maana tayari Ulimwengu na Samatta wameweza.