TAFADHARI, MICHEZO INAWEZA KUWASAIDIA MAGUFULI NA LOWASSA

Na Saleh Ally

UCHAGUZI Mkuu wa Rais, Wabunge na Madiwani bado uko katika mchakato wa hesabu na karibu kila Mtanzania anasubiri kwa hamu kupata majibu yake.

Kuhusiana na udiwani na ubunge, sehemu nyingi majibu yamepatikana na kila upande hasa sehemu mbili zenye upinzani CCM na Chadema, zimeanza kujua mwelekeo.

Kwamba kila upande umeshinda huku, umeshindwa kule na kinachobaki ni kujipongeza na kusikitika katika sehemu ambazo wamefeli.

Wakati matokeo yanaendelea kutoka, Kamati ya Uchaguzi ya Zanzibar (Zec) imefuta uchaguzi wa visiwani humo kwa madai haukuwa wa huru na haki na tayari kumekuwa na mijadala kuhusiana na suala hilo kama ni sahihi au la.

 Wako ambao wamekuwa wakitaka na uchaguzi wa Tanzania Bara kufutwa. Lakini Mwenyekiti wa Tume ya Uchaguzi Tanzania (Nec), Jaji Mstaafu, Damian Lubuva amelishafafanua hilo kwamba ni sehemu mbili ambazo haziingiliani.

 Upande wa Bara, nako tayari Chadema kupitia mgombea wake wa Urais, Edward Lowassa wamesema hawayatambui matokeo yanayoendelea kutolewa kwa madai hawajatendewa haki. Lakini niwe mkweli, sikuona kama wana hoja za msingi.

 Hali kadhalika, upande wa CCM ambao mgombea wao wa Urais ni John Pombe Magufuli, nao wamelalamika kwamba hawakutendewa haki kwenye uchaguzi wa wabunge. Mfano wao mmoja ni jimbo la Kawe ambalo Halima Mdee wa Chadema amemshinda Kipi Warioba wa CCM. Wao wameamua kwenda mahakamani.

 Haya ni makala ya michezo kuhusiana na hali ya nchi yetu kwa kuwa sisi wanamichezo tunaishi ndani ya nchi hii. Nataka niwakumbushe wanasiasa kuwa wazalendo na kuangalia kwamba wanachotaka kufanya kinaonyesha kina maslahi yao binafsi na si kwa ajili ya nchi yetu.

Nataka kuwakumbusha kwamba katika ushindani huu, lazima CCM wangeshinda upande fulani na Chadema kwa upande wa Ukawa wangeshinda kwingine.

 Mkitaka kung’ang’ania mmoja ashinde kila upande ni jambo ambalo haliwezekani. Pia naona hoja zenu zinazojengwa kwamba mmeonewa, si kubwa na zinazoeleweka. Zinaonyesha mnataka madaraka tu.

Nimeona vijana wengi mnashiriki, mnaingia mitaani, mnachoma majengo lakini najua mnafanya hivyo kwa ushawishi na manufaa ya wanasiasa hao ambao mkiumia wataishia kuwapa pole za midomo na wakifanikiwa mtawaona wanapita mbali na hata nafasi ya kuwaona kwenu itakuwa shida kabisa.

Chonde vijana wenzangu, tunahitaji amani kwa kuwa Tanzania ndiyo kwetu, hatuna pa kwenda zaidi ya hapa. Tusiichezee amani yetu kwa kutaka kumfurahisha Lowassa au Magufuli au kuonyesha tunazipenda sana Chadema au CCM.

Kwa upande wa wanamichezo niwakumbushe, kutakapokuwa hakuna amani. Hatuwezi kuona mechi za Ligi Kuu Bara, hatutakuwa na nafasi ya kushuhudia mechi za England, Hispania au kwingineko Ulaya tukiwa tumetulia.

Nawakumbusha timu yetu ya taifa, Taifa Stars ina jukumu kubwa Novemba 14 itakapokuwa inapambana na Algeria kwenye Uwanja wa Taifa jijini Dar es Salaam. Bila amani, hatutaenda uwanjani na huenda mechi itahamishiwa Kenya, Rwanda, Burundi au kwingineko ambalo si jambo sahihi.

Bado kumbuka kuna watoto na vijana wengi wa Kitanzania wanahitaji kukua katika michezo mbalimbali. Ili wafikie ndoto zao lazima kuwe na viwanja na makocha bora. Lakini amani inahitajika kwa ajili ya utekelezaji kufikia ndoto zao. Pia michezo, ndiyo inaweza kuwakutanisha nyote mliofarakiana kama walivyofanya Rwanda na nchi nyingine nyingi. Mnaweza kuitumia kama sehemu ya umoja.

Siamini kudai haki kwa kubomoa taifa ni sahihi, siamini kama ushabiki au uroho wa madaraka kwa viongozi wa vyama vyote vinavyoonesha uchu ni sahihi. Tuangalie nchi yetu, tukumbuke hata walioharibikiwa, kabla waliishi kwa amani, wakalilia kura na kudai wanaonewa, mwisho wameharibu nchi zao na leo wanaishi katika nchi za wengine ambao ni wavumilivu.

Kutoka hapa ukaishi nchi yenye amani pia ni aibu. Kwani unafikiri unakokimbilia wao huwa hawakorofishani au kutofautiana. Lakini kuna mambo walitumia busara ndiyo maana wakabaki na amani. Tafadhali wanasiasa, tafadhali WanaCCM, Chadema, Cuf na vyama vingine. Fanyeni yenu, lakini amani ndiyo muhimu zaidi.