HALL ASITISHA MPANGO WA KUWATOA KWA MKOPO AME ALI, SINGANO

AME ALI (KUSHOTO)

Kocha Mkuu wa Azam, Muingereza, Stewart Hall, amewawekea ngumu Coastal Union baada ya timu hiyo kupiga hodi klabuni hapo ikihitaji wachezaji kipindi hiki cha usajili wa dirisha dogo.

Awali, Azam ilitangaza huenda ingewatoa kwa mkopo baadhi ya nyota wao kwenye dirisha hili la usajili ndipo Coastal ikatumia mwanya huo kwenda kuzungumza nao mapema ili iwapatie wachezaji hao.

Baadhi ya wachezaji waliotarajiwa kutolewa kwa mkopo ni Ramadhani Singano ‘Messi’ na Ame Ally, lakini kwa sasa mpango huo umesitishwa na Hall kwa kusema katika kikosi chake hakuna mchezaji atakayetoka kwa muda huu.

Mwenyekiti wa Kamati ya Usajili ya Coastal, Salim Bawazir, amesema wanasikitika kwa dili lao hilo kukwama kwani walipanga kuwachukua wachezaji hao ili kuziba nafasi kwenye kikosi chao ambapo wanahitaji kiungo, straika na beki.

“Baada ya kusikia kwamba Azam inataka kuwatoa kwa mkopo baadhi ya wachezaji wao tukaenda kuzungumza nao, lakini kocha wao mkuu akagoma kwa kusema wachezaji wote waliopo anawahitaji.

“Kutokana na kauli hiyo, tukawa hatuna jinsi, tukaamua kwenda sehemu nyingine na tayari kwa sasa tupo kwenye mazungumzo na baadhi ya timu ili kuhakikisha kipindi hiki cha usajili tunafanikisha kile tulichodhamiria,” alisema Bawazir.

Timu ya Coastal mpaka Ligi Kuu Bara inasimama ilikuwa inashika nafasi ya 13 ikiwa na pointi saba baada ya kucheza mechi kumi, ikishinda moja, sare nne na kupoteza tano.